სახელმწიფო უსაფრთხოების სამსახურში მალხაზ მაჩალიკაშვილის მხარდამჭერის, ოჯახის ახლობელის გიორგი ოლქიევის გამოკითხვა მიმდინარეობს. ის უწყებაში ადვოკატთან ერთად მივიდა. როგორც მან სუს-ში შესვლამდე ჟურნალისტებს განუცხადა, გამოკითხვაზე მოწმის სახით არის დაბარებული, თუმცა კონკრეტულად რომელ სისხლის სამართლის საქმეზე დაიბარეს, ინფორმაცია არ აქვს. გიორგი ოლქიევი ვარაუდობს, რომ კონტრტერორისტულ ცენტრში მისი დაბარება შესაძლოა, მალხაზ მაჩალიკაშვილის გარშემო განვითარებულ მოვლენებს უკავშირდებოდეს.
გარდა ამისა, მისი განმარტებით, 14:00 საათზე პროკურატურაშიც არის გამოკითხვაზე დაბარებული 20 ივნისის აქციის საქმეზე, თუმცა საგამოძიებო უწყებაში მისვლას არ აპირებს.
შეგახსენებთ, რომ სახელმწიფო უსაფრთხოების სამსახურმა სავარაუდოდ, მალხაზ მაჩალიკაშვილისა და მისი ძმის შვილის მორის მაჩალიკაშვილის საუბრის ჩანაწერი გაავრცელა. ჩანაწერის მიხედვით, მალხაზ მაჩალიკაშვილი ძმის შვილს სავარაუდოდ, სუს-ის უფროსის ყოფილი მოადგილის, სოსო გოგაშვილის თვალთვალს ავალებს. ჩანაწერში მაჩალიკაშვილი მორის (ჰუსეინი) მაჩალიკაშვილს ეუბნება, რომ მისი საქმე მხოლოდ გოგაშვილია.