საგზაო ინფრასტრუქტურის განახლება-რეაბილატაცია მაღალმთიან აჭარაში აქტიურ ფაზაშია. აჭარის ფინანსთა და ეკონომიკის სამინისტროს ინფორმაციით, მშენებლობა დასასრულს უახლოვდება და აგვისტოს ბოლოს ექსპლუატაციაში შევა 30-მეტრიანი ხიდი ხულოს მუნიციპალიტეტში.
პროექტის თანახმად, ხიდის მშენებლობის პარალელურად, იგეგმება 225 მეტრის სანიაღვრე არხის, დამცავი ზღუდეების, 1800 კბ. მ.-ის გაბიონისა და 202 მეტრზე გზის საფარის განახლება.
აქტიურად მიმდინარეობს ინფრასტრუქტურული სამუშაოები შუახევის მუნიციპალიტეტშიც. შუახევი-ჩირუხის მიმართულებით დასასრულს უახლოვდება 3 535 მეტრზე ასფალტ-ბეტონის გზის საფარის დაგება. შენდება 190 მეტრის სიგრძის საყრდენი კედელი, დამცავი ზღუდე 2885 მეტრზე და 1792 მეტრი სიგრძის სანიაღვრე არხი.
ინფრასტრუქტურული სამუშაოები შუახევის მუნიციპალიტეტში 5 მიმართულებით გრძელდება და, ჯამურად, დაგეგმილია 1 ხიდის განახლება და 2 აშენება. დაახლოებით, 17 კილომეტრის გზაზე იგეგმება ბეტონის საფარის დაგება. როგორც აჭარის ეკონომიკისა და ფინანსთა სამინისტროში აცხადებენ, ინფრასტრუქტურის განახლება-რეაბილიტაციაზე 12, 4 მილიონი ლარი დაიხარჯება და სამშენებლო სამუშაოები აგვისტოს ბოლოსთვის დასრულდება.