ამჟამად ჩვენ ნაქირავებ ბინაში ვცხოვრობთ, კრედიტით შევიძინეთ ბინა, მაგრამ მისი გარემონტება სახსრების გამო ვერ შევძელით და გავყიდეთ, – ამის შესახებ „პრაიმტაიმთან“ „რუსთავი 2“-ის ყოფილი გენერალური დირექტორის, ნიკა გვარამიას მეუღლე სოფო ლილუაშვილმა განაცხადა.
სოფო ლილუაშვილის განცხადებით, მეუღლეს მასთან ბინის გაყიდვაზე საუბარი ჰქონდა, რაშიც დაეთანხმა.
„ბინასთან დაკავშირებით მე და ნიკას გვქონდა საუბარი. მე ამ დროს ამერიკაში ვიყავი. გამიზიარა, რისთვისაც სჭირდებოდა ამ ბინის გაყიდვა და მეც დავთანხმდი ცხადია, იმიტომ, რომ მე მჯერა ნიკასი, მჯერა, რომ ის თავის მიზანს ყოველთვის აღწევს, მჯერა იმისი, რომ ის ძალიან კარგ საქმეს ემსახურება და ვთვლი, რომ დღეს საქართველოში ერთადერთია, ვინც ესე უსასყიდლოდ იმისთვის იბრძვის, რომ მისმა შვილებმა და შვილიშვილების თაობამ შეძლონ ნორმალურ ქვეყანაში ცხოვრება“, – განაცხადა ნიკა გვარამიას მეუღლემ.
მისი თქმით, ოჯახი ამჟამად ქირით ცხოვრობს.
„ჩვენ ამჟამად, დღეს ვცხოვრობთ ნაქირავებ ბინაში, კრედიტით შევიძინეთ ბინა, მაგრამ მისი გარემონტება სახსრების გამო ვერ შევძელით თუ ვინმეს აინტერესებს, ეს ბინაც გავყიდეთ. კრედიტი ჩაიფარა იმ ფულით, ამ წუთას მე და ნიკა, შვილებთან ერთად, ვცხოვრობთ ნაქირავებ ბინაში“, – განმარტა „რუსთავი 2“-ის ყოფილი გენერალური დირექტორის მეუღლემ.