ბრაზილიის პრეზიდენტმა, ჟაირ ბოლსონარომ საფრანგეთის პირველ ლედის, ბრიჯიტ მაკრონს, გარეგნობის გამო დასცინა. ამის შესახებ საერთაშორისო მედია წერს.
ბოლონსარო Facebook-ზე თავისი მხარდამჭერის პოსტს გამოეხმაურა, რომელზეც ბრიჯიტ მაკრონი და ბრაზილიის პირველი ლედი, მიშელ ბოლონსარო ერთმანეთს იყვნენ შედარებული წარწერით: “ახლა ხვდებით, რატომ დევნის მაკრონიბოლონსაროს?”. ბრაზილიის პრეზიდენტმა პოსტს შემდეგი კომენტარით უპასუხა: ” ნუ შეურაცხყოფ ბიჭს, ჰა, ჰა”. ის კომენტარში საფრანგეთის პრეზიდენტს ემანუელ მაკრონს გულისხმობდა.
მოგვიანებით, საფრანგეთის პირველი ლედის შესახებ ბოლონსაროს კომენტარს ემანუელ მაკრონმა უპასუხა.
“მან ჩემი ცოლის შესახებ უჩვეულოდ უხეში კომენტარი გააკეთა. რა შემიძლია ვთქვა? სამწუხაროა. პირველ რიგში ეს სამწუხაროა მისთვის და შემდეგ ბრაზილიელებისთვის. ალბათ, ბრაზილიელ ქალებს შერცხვებათ, როცა ასეთ რამეს თავიანთი პრეზიდენტისგან წაიკითხავენ. მე პატივს ვცემ ბრაზილიელ ხალხს და ვიმედოვნებ, რომ ძალიან მალე ეყოლებათ ისეთი პრეზიდენტი, რომელიც სწორად მოიქცევა”, – განაცხადა ემანუელ მაკრონმა.
ბრაზილიასა და საფრანგეთს შორის ურთიერთობა ჟაირ ბოლონსაროს პრეზიდენტად არჩევის შემდეგ დაიძაბა. გასულ თვეში ბრაზილიის ლიდერმა ფრანგ დიპლომატთან შეხვედრა გააუქმა და ამის ნაცვლად ვარცხნილობის შეცვლა გადაწყვიტა, რომელსაც Facebook-ის Live-ით უჩვენებდა.