ყაზბეგის მუნიციპალიტეტის დაბა სტეფანწმინდაში წმინდა ილია მართლის სახელობის გიმნაზიასთან ახალი საფეხბურთო მოედანი გაიხსნა. საქართველოს ფეხბურთის ფედერაციის ინფორმაციით, მოედნის გახსნას სფფ-ის პრეზიდენტი ლევან კობიაშვილი და პირველი ვიცეპრეზიდენტი კახა ჭუმბურიძე ვეტერან ფეხბურთელებთან ალექსანდრე ჩივაძესთან, გიორგი ნემსაძესთან და გოჩა ჯამარაულთან ერთად დაესწრნენ.
საფეხბურთო მოედანი სტეფანწმინდისა და ხობის მთავარეპისკოპოსის მეუფე იეგუდიელისა და დარიალის მონასტრის წინამძღოლის მამა იოსების ინიციატივით მოეწყო. მეუფე იეგუდიელმა და ლევან კობიაშვილმა შეკრებილ საზოგადოებას სიტყვით მიმართეს, ახალი საფეხბურთო მოედნის გახსნა მიულოცეს და ფეხბურთის განვითარებისა და ჯანსაღი ცხოვრების წესის ხელშეწყობის მნიშვნელობაზე ისაუბრეს. აღნიშნულ მოედანზე გიმნაზიის მოსწავლეების გარდა, მთელი რეგიონის მოსახლეობას შეეძლება ფეხბურთის თამაში.
„დღეს, სტეფანწმინდას და რეგიონს ახალი საფეხბურთო მოედანი შეემატა. ეს ჩემთვის ორმაგად სასიხარულოა და ბევრად მეტს ნიშნავს, რადგან, წარმოშობით სწორედ ამ რეგიონიდან ვარ. მიხარია, რომ ეს არაჩვეულებრივი პროექტი განხორციელდა. ახალი მოედანი მნიშვნელოვანია ფეხბურთის პოპულარიზაციისა, ხელშეწყობისთვის და ახალგაზრდებს საშუალებას მისცემს ითამაშონ ფეხბურთი, იცხოვრონ სპორტული და ჯანსაღი ცხოვრების წესით. ფეხბურთის ფედერაცია ყველაფერს გააკეთებს საიმისოდ, რომ მაქსიმალურად ხელი შევუწყოთ ყველა რეგიონს, რათა ახალგაზრდა თაობას ფეხბურთის თამაშის საშუალება მიეცეს. განსაკუთრებული მადლობა მეუფე იეგუდიელს და მამა იოსებს, რომლებმაც უდიდესი შრომა გასწიეს და რეგიონისთვის უდიდესი საქმე გააკეთეს“, – ამბობს სფფ-ის პრეზიდენტი ლევან კობიაშვილი.
ლევან კობიაშვილმა და საქართველოს ვეტერანმა ფეხბურთელებმა გიმნაზიას სიმბოლურად ეროვნული ნაკრების სახელობითი მაისურები გადასცეს. ამას გარდა, საქართველოს ფეხბურთის ფედერაციამ გიმნაზიის მოსწავლეებს საჩუქრად ფეხბურთის ბურთები, ფორმები და სხვადასხვა ინვენტარი გადასცა.
