ავთანდილ წერეთლის სარჩელი თბილისის სააპელაციო სასამართლომ წარმოებაში არ მიიღო. ამის შესახებ ინფორმააციას წერეთლის ადვოკატი ავრცელებს.
უფლებადამცველის თქმით, წერეთელს ათ სექტემბრამდე აქვს დრო, რომ მიიღოს გადაწყვეტილება გადაიხდის თუ არა გირაოს. მისივე თქმით, ავთანდილ წერეთელი გირაოს გადახდას არ აპირებს.
“სააპელაციო სასამართლომ ჩათვალა, რომ პირველი ინსტანციის სასამართლოს საკითხი სრულყოფილად ჰქონდა განხილული, რასაც ჩვენ, რა თქმა უნდა, არ ვეთანხმებით, თუმცა, სხვა გზა არ არის, აღკვეთის ღონისძიების კუთხით სააპელაციოს გადაწყვეტილება საბოლოოა და ის აღარ საჩივრდება, შესაბამისად, ათ სექტემბრამდე გვაქვს დრო, რომ გადავწყვიტოთ კონკრეტულად რას ვაკეთებთ. ბატონი ავთო არ აპირებს ფულის გადახდას.
ფულის გადახდის გარდა, შესაძლებელია უძრავი ქონებაზე საუბარი და თუ არადა, თუ არც უძრავი ქონებით მოხდა უზრუნველყოფა და არც თანხით გადახდა, ასეთ შემთხვევაში, პროკურატურა უფლებამოსილია მიმართოს სასამართლოს უფრო მძიმე აღკვეთის ღონისძიების, ამ შემთხვევაში პატიმრობის თაობაზე”,- ამბობს ადვოკატი.
ბიზნესმენ ავთანდილ წერეთელს ბრალი მამუკა ხაზარაძისა და ბადრი ჯაფარიძის შემდეგ, მიმდინარე წლის 22 აგვისტოდ წარუდგინეს. მთავარი პროკურატურა მას, თიბისი ბანკის დამფუძნებლებისათვის უკანონო შემოსავლების ლეგალიზებაში დახმარებას ედავება, “რასაც თან ახლდა განსაკუთრებით დიდი ოდენობით შემოსავლის მიღება”.
ავთანდილ წერეთელი ტელეკომპანია პირველის ხელმძღვანელის, ვახტანგ წერეთლის მამაა.