კორცხელს თუ არ ჩავთვლით, წლევანდელი საარჩევნო კამპანია წივილ-კივილის გარეშე მიმდინარეობს, თუმცა როგორც „ვერსიას“ ეუბნებიან, გარკვეულ გართულებებს ხმის მიცემის დღეს, ანუ 8 ოქტომბერს უნდა ველოდეთ. ერთ-ერთი ასეთი „გარკვეული გართულება“ კი, როგორც „ვერსიის“ კონფიდენციალური წყაროები ამბობენ, შესაძლოა, არჩევნების გაყალბება იყოს.
„თავს ვერ დავდებ, რომ გაყალბებისკენ მიდრეკილება ხელისუფლებას არ აქვს, მაგრამ ხელისუფლების მხრიდან ამას მასობრივი სახე არ ექნება. იმ ინფორმაციის თანახმად, რომელიც ჩემთვის გახდა ცნობილი, გაყალბებისთვის _ არც მეტი, არც ნაკლები _ ნაციონალური მოძრაობა ემზადება. ახლა, შეიძლება, ზოგს გაეცინოს და თქვას, ნაცები ვეღარც ცესკო-ს აკონტროლებენ და ვეღარც _ ადგილებზე საარჩევნო კომისიებსო, მაგრამ დამიჯერეთ, მიშას გუნდმა გაყალბების სრულიად ახალი ფორმა მოიფიქრა, რომელიც აქამდე არასოდეს გამოუყენებია“, _ ამბობს „ვერსიის“ ინფორმატორი და აქვე, აკონკრეტებს, რომ გაყალბების ეს ახალი ფორმა მთელი საქართველოსთვის კი არა, აჭარის რეგიონისთვისაა გათვლილი.
ინფორმატორის მონაყოლისთვის „ვერსიას“ შეიძლება, ყურადღება არ მიექცია, მაგრამ ბოლო დროს აჭარაში მოვლენები დრამატულად ვითარდება და აი, რატომ:
გარდა იმისა, რომ ავტონომიური რესპუბლიკის უმაღლესი საბჭოს თავმჯდომარე არჩევნების წინ მოულოდნელად შეიცვალა, ამავე პერიოდში, ლევან ვარშალომიძე ზარ-ზეიმით დაბრუნდა.
რა მიზანს ემსახურებოდა ვარშალომიძის ასეთი ხმაურიანი დაბრუნება? _ ამ კითხვაზე „ვერსიის“ ინფორმატორს ასეთი პასუხი აქვს:
„ვარშალომიძის საქართველოში ცამპა-რუმპით ჩამოსვლა, ერთის მხრივ, საარჩევნო კამპანიისა და პიარის ნაწილი იყო _ ამ ფაქტს ყურადღება მოსახლეობის იმ ნაწილმაც მიაქცია, ვისაც ნაციონალები, მაპატიეთ და, სულ ცალ ფეხზე ჰკიდია, მაგრამ ყველაფერი ეს უფრო შორსმიმავალი გეგმის ნაწილია ანუ იმ გეგმისა, რომელიც, მე თუ მკითხავთ, ჯერ კიდევ მაშინ დაიწერა, როცა მიხეილ სააკაშვილი საქართველოში იყო და პრეზიდენტის მოვალეობას ასრულებდა. დიახ, არ მოგესმათ, ეს მიშას გეგმაა და ახლავე აგიხსნით, რასაც ვგულისხმობ:
ალბათ, გახსოვთ, 2013 წელს, სააკაშვილმა ვითომ პატრიოტული ნაბიჯი რომ გადადგა და გვახარა _ პირველ ეტაპზე, 936 თურქეთელ ქართველს ორმაგი მოქალაქეობა გამარტივებული წესით მივანიჭეო. ეს ინიციატივა ნაციონალებმა მაშინ იმით გაამართლეს, რომ ქართველებს, რომლებიც საუკუნეებია, თურქეთში ცხოვრობენ, თავიანთ ისტორიულ სამშობლოსთან კავშირი აღედგინათ, მაგრამ ამას სინამდვილეში, პოლიტიკური საბაბი ჰქონდა.
ზუსტად არ ვიცი, მაშინ თურქეთის რამდენმა ათასმა მოქალაქემ მიიღო საქართველოს მოქალაქეობა, მაგრამ მაქვს ინფორმაცია, რომ ორმაგი მოქალაქეობის მქონე ეს ადამიანები ახლა საქართველოში დაბრუნებას მასობრივად აპირებენ. მომაწოდეს ინფორმაცია, რომ 500 პიროვნება, რომელიც თურქულ გვარს ატარებს და რომელსაც, თურქულთან ერთად, საქართველოს მოქალაქის პასპორტიც აქვს, უკვე აჭარაშია ჩამოსული”.
ერთი სიტყვით, ,,ვერსიის” წყაროს ვერსიით, ორმაგი მოქალაქეობის მქონე ეს ამომრჩევლები 8 ოქტომბერს სააკაშვილის პარტიას ფასდაუდებელ სამსახურს გაუწევენ და ისეც შეიძლება მოხდეს, რომ ბათუმის თავზე ნაციონალური მოძრაობის დროშა აფრიალდეს.
ოფიციალური ინფორმაციით, 2013 წლისთვის მიხეილ სააკაშვილმა თურქეთის რესპუბლიკის მოქალაქეებისთვის საქართველოს მოქალაქის სტატუსის მისანიჭებლად სამ თვეში სამი ბრძანება გამოსცა: 10 სექტემბერს პრეზიდენტმა საქართველოს მოქალაქეობა მიანიჭა თურქეთის რესპუბლიკის 935 მოქალაქეს, 13 ოქტომბრის ბრძანებით – 1088 პირს, ხოლო 5 ნოემბრის ბრძანებით – 735 პირს. საქართველოს მოქალაქის სტატუსი თურქეთის რესპუბლიკის 2 758-მა მოქალაქემ მიიღო.
იმავე წლის 12 ნოემბერს, პრეზიდენტის სასახლესთან კვლავ გაჩნდა მოქალაქეობის მსურველთა ცოცხალი რიგი და პრეზიდენტის ადმინისტრაციამ გაავრცელა ინფორმაცია, რომ იმ დღეს მათთან 1490-ზე მეტი განცხადება შევიდა. საბოლოოდ, რამდენმა მიიღო საქართველოს მოქალაქეობა, ამის დაზუსტება შესაბამის ორგანოებს არ გაუჭირდებათ.
გარდა ამისა, ,,ვერსიას” ისიც უთხრეს, რომ ნაცონალები აჭარაში კიდევ ერთი საარჩევნო ჯოკერის გათამაშებას აპირებენ, ანუ დასამალი არავისთვისაა, რომ აჭარის მოსახლეობის დიდი ნაწილი სამუშაოდ მეზობელ თურქეთშია წასული, მაგრამ ისინი ნაციონალებთან ვალში არიან, რადგან უშუალოდ ისინი ან მათი ოჯახის წევრები ყოფილი მმართველი პარტიისგან, ხელფასის სახით, ყოველთვიურად გარკვეულ თანხას იღებენ.
,,მოგეხსენებათ, არავინ, მით უმეტეს, პოლიტიკოსები ფულს ისე არავის მისცემენ, სანაცვლოდ რამე არ მოითხოვონ. ეს ,,რამე” კი, რა თქმა უნდა, საარჩევნო ხმებია. ჰოდა, როგორც გავიგე, ნაცებმა უკვე განგაში გამოაცხადეს და ყველა იმ ოჯახს, რომელსაც ჯამაგირს აძლევენ და რომლის ოჯახის ერთი ან რამდენიმე წევრი თურქეთშია სამუშაოდ წასული, უბრძანეს, რომ ყველა ეს ადამიანი 8 ოქტომბერს საქართველოში უნდა იყოს, საარჩევნო ურნასთან მივიდეს და ხმა ნაციონალურ მოძრაობას მისცეს.
თუ ეს გეგმა ამუშავდა, მერწმუნეთ, აჭარაში ნაციონალების გარდა, პირველ ადგილზე გასვლის შანსი სხვას არავის ექნება”, _ უთხრა ,,ვერსიას” აჭარელმა ინფორმატორმა, რომელმაც აქვე განმარტა, რომ ამომრჩევლისთვის ,,ფიქსირებული ხელფასის” დარიგების სქემა განსაკუთრებით აპრობირებული აჭარის მაღალმთიან რაიონებშია.
versia.ge