საქართველოს ენერგეტიკისა და წყალმომარაგების მარეგულირებელი ეროვნული კომისიის თავმჯდომარეს ირინა მილორავას თბილისის ყოფილი მერე დავით ნარმანია შეცვლის.
„2020NEWS“-ის ინფორმაციით, დავით ნარმანიას აღნიშნულ თანამდებობაზე დანიშვნა უკვე შეთანხმებულია. ამ საკითხთან დაკავშირებით სააგენტო დავით ნარმანიას დაუკავშირდა, თუმცა ის ამ ეტაპზე კომენტარის გაკეთებისგან თავს იკავებს.
საქართველოს ენერგეტიკისა და წყალმომარაგების მარეგულირებელი ეროვნული კომისიის თავმჯდომარეს უფლებამოსილების ვადა 16 სექტემბერს ეწურება.
როგორც სემეკი-ს მოქმედმა თავმჯდომარემ ირინა მილორავამ ჟურნალისტებს განუცხადა, ის საქმიანობის გაგრძელებას კომისიაში აღარ გეგმავს.
“ერთი რამ შემიძლია გითხრათ, რომ კომისიაში საქმიანობის გაგრძელებას არ ვაპირებ. ჩემი უფლებამოსილების ვადა 16 სექტემბერს იწურება. ამის შემდეგ უკვე მთავრობა პრეზიდენტს წარუდგენს კომისიის ახალი წევრის კნდიდატურას და ირჩევს პარლამენტი”,- განაცხადა ირინა მილორავამ.
დავით ნარმანია საქართველოს ენერგეტიკისა და წყალმომარაგების მარეგულირებელი ეროვნული კომისიის წევრი 2017 წლის დეკემბერში გახდა.