“ერისიონმა” Black Sea Arena-ზე შოუ-კონცერტი შსს-ს კამპანიის – „შენი გულისთვის, შენი უსაფრთხოებისთვის“ გზავნილით დაასრულა

საქართველოს ხალხური სიმღერისა და ცეკვის სახელმწიფო აკადემიურმა ანსამბლმა „ერისიონი” 13 ივნისს, საკონცერტო დარბაზ Black Sea Arena-ს სცენაზე გამართული შოუ-კონცერტი შსს-ს საგზაო მოძრაობის უსაფრთხოების კამპანიის – „შენი გულისთვის, შენი უსაფრთხოებისთვის“ – გზავნილით დაასრულა.

კონცერტის დასკვნით ნაწილზე „ერისიონის“ მოცეკვავეებმა ცეკვა „ხორუმი“ შინაგან საქმეთა სამინისტროს კამპანიის ფარგლებში დამზადებული მაისურებით შეასრულეს, რომლებზეც გამოსახულია ლოგო – საგზაო ნიშნებით დაფარული გული. ამ გზავნილით ანსამბლი „ერისიონი“ შსს-ს კამპანიას შეუერთდა და მოქალაქეებს, მათივე სიცოცხლისა და უსაფრთხოებისთვის, საგზაო მოძრაობის უსაფრთხოების წესების დაცვისკენ მოუწოდა.

საგზაო მოძრაობის უსაფრთხოების დაცვის მიზნით, შსს-ს მიერ დაწყებულ სოციალურ კამპანიას „შენი გულისთვის, შენი უსაფრთხოებისთვის“ ყოველდღიურად სხვადასხვა პროფესიის ადამიანები, კომპანიები და რიგითი მოქალაქეები განსხვავებული და საინტერესო ინიციატივებით უერთდებიან. კამპანიის მიზანია ავტოსაგზაო შემთხვევების პრევენცია და საგზაო მოძრაობის უსაფრთხოების შესახებ საზოგადოების ცნობიერების ამაღლება.