„სანამ ვინმეს რუსეთის აგენტად შერაცხავთ, კარგი იქნება გარემოებების და კონტექსტების კრიტიკული ანალიზი მოახდინოთ – „რუსეთუმეობის სტიგმა“, – ამბობს ინტერნეტტელევიზია POSTV-ის ანალიტიკოსი ბაჩო ოდიშარია საკუთარ ვიდეობლოგში.
მისი თქმით, რუსეთის აგენტად შერაცხვები და პუტინთან ვოთსაფით მესიჯბოქსის მიღება-გავრცელებაზე ბრალდებების ინტენსივობა იმდენად ისტერიულად ფიქსირდება ჩვენს ლიბერალურ საჯარო სივრცეში, რომ ნელ-ნელა გროტესკული კომედიის კატეგორიაში გადადის.
„სანამ ვინმეს რუსეთის აგენტად შერაცხავდეთ, კარგი იქნება გარემოებების და კონტექსტების კრიტიკული ანალიზი მოახდინოთ, რადგან დიდია ალბათობა, რომ ხელში ედვარდ სნოუდენის მსგავსად, ხალხის სამსახურში მდგარი ადამიანი შეგრჩეთ, რომელსაც აპრობირებული მეთოდით, ძალაუფლების ნოსტალგიით ლომკაში ჩავარდნილი მავნებლები მტრის ჯაშუშად გასაღებენ“, – ამბობს ბაჩო ოდიშარია.
ანალიტიკოსი ედვარდ სნოუდენის ისტორიას იხსენებს, რომელიც, მისი თქმით, ჩვენი დროის გმირი, მსოფლიოში ერთ-ერთი ყველაზე მნიშვნელოვანი საჯარო ფიგურა და საინტერესო პერსონაჟია კონკრეტულად ქართული რეალობისთვისაც.
„2013 წელს ედვარდ სნოუდენმა მთელს მსოფლიოს გაუმხილა ამერიკის სახელმწიფო საიდუმლო, რომ სახელმწიფოს დაზვერვის სამსახურები უსმენდნენ და უთვალთვალებდნენ საკუთარი ქვეყნის თითოეულ მოქალაქეს, ასევე ამერიკის გარეთ მცხოვრებ მოსახლეობას. ეს არის ადამიანი, რომლის წყალობითაც დღეს ვიცით, რომ ჩვენ ყოველ აქტივობას ინტერნეტში თვალს ადევნებს და საკუთარ ბაზებში ინახავს ყველა მსხვილი კორპორაცია, დაწყებული ფეისბუქით, დამთავრებული გუგლით. 2013-ში, ჯერ კიდევ ობამას ადმინისტრაციამ სნოუდენი ქვეყნის მოღალატედ, კრიმინალად და ძებნილად გამოაცხადა. მას შემდეგ ამ სტატუსს ატარებს და ამჟამად პატიმრობისგან თავის ასარიდებლად ცხოვრობს რუსეთში, ერთადერთ ქვეყანაში, რომელმაც თავშესაფარზე უარი არ უთხრა“, – ამბობს ავტორი.
მისი თქმით, ამერიკა ცივი ომის პერიოდიდან მოყოლებული რუსეთის მტრის ხატს ყველა სხვა ქვეყანაზე მეტად აყალიბებდა საკუთარი მოქალაქეების ცნობიერებაში.
„რუსეთია ის გეოგრაფიული ერთეული, სადაც მარტივადაა შესაძლებელი თქვა, რომ თუ შენი მოქალაქე იღებს თავშესაფარს, ე.ი. იქაურ მთავრობაზე მუშაობს და შენ საიდუმლოებებს გასცემს, შესაბამისად, უპირობო მოღალატე და კრიმინალია. ხო ნაცნობი სქემაა? ისევე, როგორც ჩვენთან სხვადასხვა ჯგუფები თუ ინდივიდები, უმეტესწილად თავდაუზოგავი ლიბერალები რომ ქმნიან მტრის ხატებს, უკვე იმაზეც კი, რუსულ სიმღერებს თუ უსმენ. ობამას ადმინისტრაციამ, საკუთარი ანტიკონსტიტუციური და ადამიანის უფლებების რადიკალურად შემლახავი ქმედების სააშკარაოზე გამომტან მოქალაქეს შეუკერა მოღალატის მანტია და თბილად გაახვია შიგნით. არადა კაცი ისეთი გმირი და პატრიოტია, მარტო ძველ ლეგენდებში რომ შეიძლება ამოიკითხო.
როგორ ხდება ჩვენთან იგივე სტრატეგიის მოქმედებაში მოყვანა – ბოლო პერიოდის მოვლენებს რომ გადავხედოთ, ავიღოთ მაგალითად ნაცებთან მოფლირტავე ვინმე დევიდ კრამერის და ირმა ინაშვილის დაპირისპირება, სადაც თუ ამერიკელის უსაქციელობაზე აქცენტირებდი, აპრიორი რუსეთუმე უნდა ყოფილიყავი, აგერ რამდენიმე დღის წინ გაირკვა რომ კომპანია, რომელიც ანაკლიის პორტში ინვესტორად შემოყავდა ხაზარაძეს და ირწმუნებოდა ნაღდი ბრიტონები არიანო, ყაზახი ბიზნესმენების მფლობელობაშია, რომლებიც რუსული კომპანიის, ნოვაპორტის აეროპორტების ქსელის მეწილეები არიან, ეს ინვესტორი რომ სახელმწიფომ დაიწუნა, რუსული დაკვეთა აღასრულესო, არადა საპირისპირო შემთხვევაში, სახელმწიფო რომ ყოფილიყო ამ ინვესტორის შემოყვანის ინიციატორი, მელოდია შეტრიალდებოდა და უკვე სახელმწიფო იქნებოდა დადანაშაულებული იმაში, რომ ამ გზით გაატარეს რუსეთის ინტერესებიო. იქით სირცხვილიას აქციებზე ანტიოკუპაციურიაო სცენიდან აქტიურად მიდიოდა ნაციონალური მოძრაობის მმართველობის პერიოდის რომანტიზება და მუდმივი ძახილი რომ დღევანდელ მთავრობას ჯობდნენ და ა.შ. ანუ ანტიოკუპაციურ აქციას განაგებდნენ ის ნაცები, რომელთა მმართველობის დროსაც დაიკარგა ტერიტორიები. მოკლედ, რუსეთთან აფილირების მაგალითების “ნახალკად” შეტენვა იდეალური საშუალებაა იმისათვის, რომ საკუთარი მანკიერება გადაფარო. ამ ვიდეოს კომენტარებშიც ორთოდოქსი ნაცები და ფანტომური თავისუფლებისთვის ვერბალურ ბრძოლაში ნავარჯიშები ლიბერალები დაწერენ, რომ ეს ყველაფერი რუსული ნარატივია, გაზპრომის ფულით დაფინანსებული იდეებია და ტრენინგებზე ნასწავლ სხვა სტანდარტულ სლოგანებს რაც აქვთ ხოლმე მწირ ლექსიკაში“, – ამბობს ანალიტიკოსი.
იხილეთ ვიდეოს ბმული – https://www.youtube.com/watch?v=GgTvchNDEnc&feature=youtu.be