„შეწყალება ეს არ არის ვინმეს გამართლება, საერთოდ, შეწყალება ეხება არა ანგელოზებს, არამედ დამნაშავე პირებს“, – ამის შესახებ საქართველოს პრეზიდენტმა, სალომე ზურაბიშვილმა ამერიკაში, ჟურნალისტებთან საუბრისას განაცხადა.
„შეწყალებაზე მე უკვე არაერთხელ ვთქვი, ყველაფერი რაც იყო სათქმელი. გადაწყვეტილება მივიღე ჩემით. კიდევ ერთხელ ვამბობ, რომ შეწყალება ეს არ არის ახალი სასამართლო, რომელიც ექვემდებარება რაღაც ობიექტურ კრიტერიუმებს. ეს არის შეფასება ერთი ადამიანის მიერ, რომელიც არის პრეზიდენტი, და რომელსაც ეს უფლება აქვს შეაფასოს გარემოებები და არ გამართოს ახალი სასამართლო. ეს არის რაღაც ცნებების არევა. კიდევ ერთხელ ვიტყვი, ძალიან ხაზგასმით, შეწყალება ეს არ არის ვინმეს გამართლება, საერთოდ, შეწყალება ეხება არა ანგელოზებს, არამედ დამნაშავე პირებს. ამიტომ ეს არის ის სიტუაცია რაშიც ვიმყოფებით, კიდევ ერთხელ გავიმეორებ, რომ მე ინიციატივით გამოვედი, რომ დაიწყოს წესების სხვანაირად ჩამოყალიბება და დახვეწა. ეს სამუშაო დაწყებულია და მიმდინარეობს. იყო ცილისმწამებლური წამოძახილები – პროკურატურა ამ კუთხითაც მუშაობს, დაველოდოთ მათ დასკვნებს.
მე გამოვაცხადე ჩემი წუხილი, რომ საზოგადოებაში ასეთი ვნებათაღელვა ატყდა ამ საკითხების შესახებ და ამიტომ მორატორიუმი გამოვაცხადე. რადგან ამაზეც იყო რეაქციები, განვაცხადებ, რომ არ არსებობს უფლება, რომ იყო შეწყალებული. მორატორიუმი არ არის არავის უფლებების დარღვევა. ეს არის ფრთხილი გადაწყვეტილება, იქიდან გამომდინარე, რაც საზოგადოებაში ხდება. ამ საკითხზე მე არაფერი ახალი აღარ მაქვს სათქმელი“, – ამბობს პრეზიდენტი.