შვეიცარიაში აუქციონზე ეკვატორული გვინეის ვიცეპრეზიდენტის, პრეზიდენტის ვაჟის თეოდორინ ობიანგ ნგემას „ლუქსის“ კლასის 25 ავტომობილი გაიყიდება. ინფორმაციას ამის შესახებ სააგენტო Reuters-ი ავრცელებს.
სააუქციონო სახლ Bonhams-ის შეფასებით, სრული კოლექციის ღირებულება 18,5 მილიონი შვეიცარიული ფრანკია (18,7 მილიონი დოლარი). აუქციონი დღეს, 29 სექტემბერს გაიმართება.
აუქციონზე გაიყიდება შვიდი Ferrari, სამი Lamborghini, ხუთი Bentley, Maserati და McLaren-ი. კოლექციის ყველაზე ძვირადღირებული ლოტი Lamborghini Veneno Roadster-ია, რომლის მხოლოდ 9 ეგზემპლარი არსებობს. მისი სავარაუდო ფასი 5 მილიონი შვეიცარიული ფრანკია, მიუხედავად იმისა, რომ ავტომობილის კაპოტზე ნგემას საკუთარი ინიციალები აქვს დატანილი.
შვეიცარიის მთავრობამ ავტომობილები თეოდორინ ობიანგ ნგემას 2016 წელს ჩამოართვა, როდესაც მის წინააღმდეგ ფინანსური დარღვევების გამო სისხლის სამართლის საქმე აღიძრა. თეოდორინ ობიანგ ნგემას მამა – თეოდორ ობიანგ ნგემა ეკვატორულ გვინეას 1979 წლიდან მართავს. 2019 წლის თებერვალში შვეიცარიის პროკურატურამ განაცხდა, რომ ავტომობილების კონფისკაციის სანაცვლოდ ეკვატორული გვინეის ვიცეპრეზიდენტის წინააღმდეგ არსებულ ბრალდებებს მოხსნის.
