კომპანია ,,ჰაიდელბერგცემენტ”-ის ორგანიზებით, თბილისის ცენტრალურ ქუჩებში, დღეს რიგით მერვე „თბილისის მარათონი“ გაიმართა. მორბენლებმა სტარტი რუსთაველის გამზირზე, პირველ კლასიკურ გიმნაზიასთან აიღეს. მარშრუტი ქალაქის ცენტრალურ უბნებს მოიცავდა – სპეციალურად ღონისძიებისთვის, ქალაქის ისტორიული ქუჩები გადაიკეტა.
გაიმართა ქალებისა და კაცების ნახევარმარათონი, 10 კილომეტრზე გარბენი და ბავშვთა გარბენი. 10 კილომეტრზე ქალებში ალექსანდრა ზებენმა გაიმარჯვა, კაცებში – გიორგი შეყრილაძემ. რაც შეეხება ქალების ნახევარმარათონის გამარჯვებულს, ბელორუსი ირინა ლაპიცკაია გახდა, ხოლო კაცებში – უგანდელი ისმაილ სენიანგე.
ქალთა და კაცთა ნახევარმარათონის გამარჯვებულებს ფულადი ჯილდო და სპონსორების მიერ დაწესებული პრიზები გადასცეს. პირველ ადგილზე გასულებმა 2000 ლარი მიიღეს, მეორე ადგილოსნებმა – 1500 ლარი, ხოლო მესამე ადგილის მფლობელებმა – 1000 ლარი.
რეგისტრაციიდან შემოსულ და ტრადიციულად, ,,ჰაიდლებერგცემენტის” მიერ გაორმაგებულ თანხას კომპანია ამჯერად „ძეგვის თავშესაფრის“ შენობის რეაბილიტაციას მოახმარს.