საქართველოს პროკურატურის პრესსამსახურის თანამშრომელი ნინო კოტარია, იურიდიულ საკითხთა კიმიტეტის სხდომაზე მის მიერ გადაღებულ ვიდეოზე განმარტებას აკეთებს. მასალაში ჩანს, თუ როგორ ესაუბრებიან ერთმანეთს “ნაციონალური მოძრაობის” წევრი თინა ბოკუჩავა და არასამთავრობო ორგანიზაცია GDI-ის წარმომადგენელი ედუარდ მარიკაშვილი.
“კადრებში მე ვარ, ვიდეოებს ვიღებდი და ჩავაგდე ფბ დახურულ ჯგუფში, სადაც დაახლოებით 100 კაცია. თუ ვინმეს აქვს შეხება ამ რაღაც ჯგუფთან, ნამდვილად არ ვიცი,“ – განუცხადა „ფორმულას“ ნინო კოტარიამ.
კოტარიას მიერ გადაღებული მასალა მოგვიანებით ერთ-ერთ პროსახელისუფლებო ყალბ ფეისბუკ გვერდზეც დაიდო.
მომხდარს სოციალურ ქსელში თავად თინა ბოკუჩავაც გამოეხმაურა და პროკურატურის პრესსამსახურს სამთავრობო ტროლი უწოდა.
„გაიცანით ნინო კოტარია, სამთავრობო ტროლი. საქართველოს პროკურატურა – რა უხერხულია,“ – წერს თინა ბოკუჩავა.
შეგახსენებთ, რომ იურიდიულ საკითხთა კომიტეტის სხდომა, გუშინ გაიმართა. სხდომაზე საქართველოს მთავარი პროკურორსა და უზენაესი სასამართლოს მოსამართლეობის კანდიდატს, შალვა თადუმაძეს უსმენდნენ. თინა ბოკუჩავამ, კამათის დროს, მას გაუნათლებელი და უდიპლომო უწოდა.