„მისი ჯანმრთელობის მდგომარეობიდან გამომდინარე, ერთი ჭიქა ალკოჰოლი აუცილებლად უნდა მიეღო“, – ამის შესახებ „ქართული ოცნების“ დეპუტატის, ილია ჯიშკარიანის ადვოკატმა, მარიამ კუბლაშვილმა „ღამის მთავარში“ საუბრისას განაცხადა.
გადაცემის წამყვანის, ნიკა გვარამიას კითხვაზე, თუ რა პრობლემა ჰქონდა ჯიშკარიანს, კუბლაშვილი პასუხობს:
„მას ოთხჯერ აქვს გადატანილი ინფაქტი. ნაბახუსევზე ალკოჰოლი უნდა მიეღო“.
ძალადობაში ბრალდებული „ქართული ოცნების“ დეპუტატისთვის აღკვეთის ღონისძიების შეფარდების სასამართლო სხდომა „ნიუ ჰოსპიტალში“ გაიმართა და დეპუტატს 10 000 ლარიანი გირაო შეეფარდა.
თბილისის საკრებულოს დეპუტატ ილია ჯიშკარიანს თანამშრომელი თამთა თოდაძე სექსუალურ და ფიზიკურ ძალადობაში ადანაშაულებს და ობიექტურ გამოძიებას ითხოვს.
საქართველოს გენერალურმა პროკურატურამ თბილისის საკრებულოს დეპუტატ ილია ჯიშკარიანს ბრალი 8 ოქტომბერს წარუდგინა. ამასთან, გენერალურმა პროკურატურამ თამთა თოდაძე დაზარალებულად ცნო.
ძალადობის სავარაუდო მსხვერპლის თქმით, ჯიშკარიანმა მასზე სექსუალური ძალადობა სცადა, შემდეგ კი ფიზიკურად იძალადა. საქმეზე გამოძიება სისხლის სამართლის კოდექსის სამი მუხლით მიმდინარეობს.