დიდი ბრიტანეთის პრემიერმინისტრმა ბორის ჯონსონმა ევროკავშირს Brexit-ის გადავადების საკითხზე ოფიციალური მიმართვა გაუგზავნა, თუმცა მისთვის ხელი არ მოუწერა. ინფორმაციას ამის შესახებ BBC ავრცელებს.
მიმართვის მიღება ევროსაბჭოს პრეზიდენტმა დონალდ ტუსკმა დაადასტურა. კანონით გათვალისწინებულ მიმართვასთან ერთად ჯონსონმა ევროკავშირს წერილიც მისწერა, რომელშიც განაცხადა, რომ Brexit-ის გადავადება შეცდომა იქნებოდა.
„მზად ვარ იმისთვის, რომ ევროსაბჭომ ბრიტანული პარლამენტის მიერ მოთხოვნილ გადავადებას დაუჭიროს მხარი, პრემიერის პოსტზე არჩევის დღიდან მე ყოველთვის ვამბობდი, რომ Brexit-ის გადავადება ჩვენი ქვეყნისა და ევროკავშირის ინტერესებს და ჩვენს ორმხრივ ურთიერთობებს დააზარალებს. ვისურვებდი, რომ ბრიტანულ პარლამენტს სხვა გადაწყვეტილება მიეღო, თუმცა უკვე 21 ოქტომბრიდან მთავრობა დაიწყებს მუშაობას იმაზე, რომ პროცესი 31 ოქტომბრამდე დავასრულოთ“, – ნათქვამია ბორის ჯონსონის წერილში.
17 ოქტომბერს დიდი ბრიტანეთის პრემიერმა ბორის ჯონსონმა განაცხადა, რომ დიდმა ბრიტანეთმა და ევროკავშირმა Brexit-ზე ახალ შეთანხმებას მიაღწიეს.
ოფიციალურ ლონდონსა და ბრიუსელს შორის Brexit-ის პირობების შესახებ მოლაპარაკებები 2017 წლის 19 ივნისს დაიწყო. დიდი ბრიტანეთის ყოფილმა პრემიერმინისტრმა, ტერეზა მეიმ ქვეყნის ევროკავშირიდან გასვლის პროცედურის შესახებ დოკუმენტს ხელი 2018 წლის 29 მარტს მოაწერა. ლონდონმა ევროკავშირი 31 ოქტომბერს უნდა დატოვოს.
Brexit-მა ბრიტანეთში პოლიტიკური კრიზისი გამოიწვია, რის გამოც პრემიერმინისტრი ტერეზა მეი გადადგა. დიდი ბრიტანეთის ევროკავშირიდან გასვლის შესახებ ვრცელი სტატია წაიკითხეთ ამ ბმულზე.