სოციალურ ქსელებში გავრცელდა ვიდეო, რომელშიც ჩანს, როგორ სცემენ პატიმრებს ცხინვალის წინასწარი დაკავების იზოლატორში. კადრები სათვალთვალო კამერით 2 ოქტომბერს არის გადაღებული.
გავრცელებული ინფორმაციით, პატიმრები პროტესტის ნიშნად შიმშილობდნენ. ისინი იუსტიციის დეფაქტო უწყების მიერ სასჯელაღსრულების დაწესებულებებში გამკაცრებულ რეგულაციებს აპროტესტებდნენ, თუმცა მოშიმშილე პატიმრებს სასტიკად სცემეს და საკვების მიღება აიძულეს.
მომხდარის გამო დეფაქტო პარლამენტის ნაწილი იუსტიციისა და შინაგან საქმეთა მინისტრებისთვის უნდობლობის ვოტუმის გამოცხადებას მოითხოვს. ცხინვალის იზოლატორში გადაღებულ კადრებზე კომენტარი დღეს პრემიერმინისტრმა გიორგი გახარიამ გააკეთა. გიორგი გახარია ამბობს, რომ მსგავსი შემთხვევების პრევენციისთვის ერთადერთი გზა არსებობს და ეს საერთაშორისო პარტნიორებთან ერთად მოქმედებაა.