რეგიონებში საზოგადოებრივი ცენტრების მშენებლობა გრძელდება. საქართველოს ვიცეპრემიერმა, იუსტიციის მინისტრმა თეა წულუკიანმა, 67-ე საზოგადოებრივი ცენტრი ტყიბულში გახსნა.
იუსტიციის მინისტრმა ტყიბულის მუნიციპალიტეტის მოსახლეობას სახალხო დღესასწაული “ტყიბულქალაქობა“ და საზოგადოებრივი ცენტრის გახსნა ერთად მიულოცა. როგორც თეა წულუკიანმა აღნიშნა, მომდევნო დღეებში საზოგადოებრივი ცენტრები ხულოსა და ქედაშიც გაიხსნება.
“მიხარია რომ ცენტრალური ხელისუფლება დღეს არ ჩამოსულა ტყიბულში ხელცარიელი ,სწორედ დღევანდელი დღისთვის უნდა დაგვემთხვია იუსტიციის საზოგადოებრივი ცენტრის გახსნა.ბევრჯერ გამივლია მინისტრობის პერიოდში ტყიბულში და მინახავს, რომ სამთავრობო სერვისები მაინცდამაინც კარგ პირობებში არ გაიცემოდა ,დღეიდან იხურება ყველა რეესტრი და ტყიბულელებს შეეძლებათ ერთ ადგილზე მიიღონ ყველა ის სერვისი, რაც სახელმწიფოსგან სჭირდებათ,” – განაცხადა თეა წულუკიანმა.
გახსნის საზეიმო ღონისძიებას ესწრებოდნენ თერჯოლა-ტყიბულის მაჟორიტარი დეპუტატი ელგუჯა გოცირიძე, ტყიბულის თვითმმართველობის წევრები, მოწვეული სტუმრები და ადგილობრივი მოსახლეობა.
ახალგახსნილი საზოგადოებრივი ცენტრის მომსახურებით, ტყიბულის და მისი მიმდებარე 11 სოფლის − მუხურას, სოჩხეთის, წყნორის, ძმუისის, გურნას, ბზიაურის, მანჭიორის, ციხიას, ბობოთის, ხრესილის, ლეღვას, ასევე, ტყიბულის მუნიციპალიტეტის სხვა სოფლების 24 ათასზე მეტი მცხოვრები ისარგებლებს. იუსტიციის სამინისტროს საზოგადოებრივი ცენტრები ადგილობრივთა საჭიროებებზეა ორიენტირებული. მომხმარებელი ადგილზე 200-ზე მეტი სახელმწიფო და კერძო სერვისით ისარგებლებს.
ტყიბულის საზოგადოებრივი ცენტრი იმერეთის რეგიონში რიგით მეთხუთმეტეა. ტყიბულის გარდა, ცენტრები ფუნქციონირებს საწირეში, ზედა საზანოში, გეგუთში, შორაპანში, ზეინდარში, მეორე სვირში, ღორეშაში, კიცხში, ხევში, კორბოულში, ხრეითში, დიდ ჯიხაიშში, უსახელოსა და საჩხერეში. თანამედროვე სტანდარტების შენობა, რომლის ინფრასტრუქტურა შშმ პირებზეა მორგებული, სპეციალურად საზოგადოებრივი ცენტრისთვის აშენდა. სახელმწიფო სერვისების განვითარების სააგენტოს ტერიტორიული ოფისი ცენტრის გახსნამდე 2005 წლიდან ახობაძის ქ. №12-ში, საცხოვრებელი კორპუსის პირველ სართულზე ფუნქციონირებდა. მცირე ფართობი და შეუსაბამო ინფრასტრუქტურა მოქალაქეთა ხარისხიან მომსახურებას ართულებდა, ხანდაზმულებისა და შშმ პირებისთვის კი, სახელმწიფო სერვისებზე წვდომა განსაკუთრებულ პრობლემებთან იყო დაკავშირებული. საზოგადოებრივი ცენტრი საჯარო და კერძო სექტორის წარმატებული თანამშრომლობის საუკეთესო მაგალითია.
ცენტრში ხელმისაწვდომი იქნება “მაგთისა“ და “ლიბერთი ბანკის“ მომსახურებაც. მომხმარებელს ადგილიდან გაუსვლელად შეეძლებათ, მიიღონ პასპორტი/პირადობის მოწმობა, განახორციელონ უძრავი ქონების რეგისტრაცია, სულადობის ცნობა, საკადასტრო გეგმის მომსახურება, წარადგინონ განაცხადი სოციალურად დაუცველი ოჯახების მონაცემთა ერთიან ბაზაში რეგისტრაციის მიზნით, მიიღონ საარქივო მომსახურება და სხვა.
ამავე ცენტრში პრობაციის ეროვნული სააგენტოს მომსახურების მიღებაც იქნება შესაძლებელი. 67-ე საზოგადოებრივი ცენტრის გახსნის ღონისძიების ოფიციალური ნაწილის დასრულების შემდეგ კონცერტი გაიმართა. მიმდინარე წლის ბოლომდე 8 საზოგადოებრივი ცენტრის გახსნაა დაგეგმილი, კერძოდ: ქედაში, ხულოში, ამბროლაურში, დუშეთში, ცაგერში, თეთრიწყაროში, ჭრებალოსა და ყაჩაღანში.