ბოლო პერიოდში განვითარებული მოვლენები, სკანდალი საპატრიარქოს ირგვლივ უკავშირდება პატრიარქის და ზოგადად ეკლესიის სახელის სრულ დისკრედიტაციას, – ამის შესახებ საპატრიარქოს „ეთნოგენეტიკის კვლევითი ცენტრის“ ხელმძღვანელმა, გიორგი ანდრიაძემ მედიაჰოლდინგ „კვირას“ განუცხადა.
ანდრიაძე მეუფე იაკობის გუშინდელ განცხადებას გამოეხმაურა.
„ბოლო პერიოდში განვითარებული მოვლენები, სკანდალი საპატრიარქოს ირგვლივ უკავშირდება პატრიარქის და ზოგადად ეკლესიის სახელის სრულ დისკრედიტაციას. ეს პროცესი ბოლო 3 წელია ინტენსიურად მიდის და მისი მიზანია ქართული საზოგადოების სრული დემორალიზაცია, განადგურება, რაც სხვადასხვა ფორმით მიმდინარეობს, ეს არის ბანკის ვალები, მიგრაციული პროცესები, თუ ეკონომიკური კატასტროფა, რაც საქართველოში ხდება. ახლა ამ ხალხისთვის ბოლო იმედის წართმევა სურთ, რასაც ჰქვია რწმენა და სარწმუნოება. პატრიარქის გვერდით დგას მისი ძველი გუნდი, რომელიც 40 წელია მის გვერდითაა, ზოგი გვიან შეუერთდა ასაკის მიხედვით, ეპისკოპოსები, რომლებიც ხმას არ იღებენ და ამ ბაკქანალიაში არ ერთვებიან. პროცესშია ჩართული 2 ეპისკოპოსი, რომლებიც ერთმანეთთან ძალიან ახლო უთიერთობაში არიან, ვინაიდან, პეტრემ გამოზარდა იაკობი და აქცია ყველაფრად. ძალიან შეხმატკბილებულები იყვნენ ისინი წლების განმავლობაში.
ასე რომ, საჭიროა სახელმწიფო სტრუქტურებმა, რომელზეც არის მთელი ამ პროცესის პასუხიმგებლობა, ხელი გაანძრიონ და დაამთავრონ ეს ბაკქანალია, რომელიც ეკლესიის გარშემო მიმდინარეობს. საქართველოს მართლმადიდებელი ეკლესია არ არის რიგითი კონფესია საქართველოში. ეს არის სახელმწიფოებრივი ინსტიტუცია, მის წიაღში ხელის ფათური და პროვოკაციების მოწყობა ქართველი ერის წინაშე დიდი დანაშაულია“- განაცხადა ანდრიაძემ.
ცნობისთვის, ბოდბელმა ეპისკოპოსმა, მეუფე იაკობმა განაცხადა, რომ გიორგი გახარია, გიორგი კვირიკაშვილი და ვახტანგ გომელაური სთავაზობდნენ პატრიარქის გადაყენებას. მეუფე იაკობის ინფორმაციით, მსგავსი შეხვედრები გაიმართა სხვა მეუფეებთანაც.
“პირველი მე ვიყავი მაგ შეხვედრაზე, მერე იყო მეუფე თეოდორე, მერე – მეუფე გრიგოლი და მეუფე პეტრე“ – განაცხადა მეუფე იაკობმა.
„კვირა“