თბილისის მერმა კახა კალაძემ Facebook გვერდზე რუბრიკა #არაფერიარკეთდება წამოიწყო. ის ლაივ რეჟიმის საშუალებით სოციალური ქსელის მომხმარებლებს იმ მიმდინარე პროექტების შესახებ მიაწვდის ინფორმაციას, რომელიც დედაქალაქის მასშტაბით მიმდინარეობს.
პირველი ასეთი ჩართვაკალაძეს გლდანში მიმდინარე საავტომობილო გზის სამუშაოებიდან ჰქონდა. მერმა ვეკუასა და ხიზანიშვილის ქუჩების რეაბილიტაციის პროცესი მიმოიხილა. მისი თქმით, სამუშაოების პირველი ეტაპი შესრულებულია, რაც მიწისქვეშა კომუნიკაციების გამართვას გულისხმობდა. სამუშაოების დასრულებამდე კი 80 მეტრიანი მონაკვეთის მოასფალტება რჩება.
„მინდა ბოდიში მოვუხადო მოსახლეობას, რომელსაც გაუსაძლის პირობებში უწევდათ გადაადგილება. მტვერი, ბუღი, ტალახი… ფეხით მოსიარულეთათვის ძალიან მძიმე იყო ეს ყველაფერი. ჩვენ რამდენჯერმე გვქონდა შეხვედრა კომპანიასთან. მოხდა პროექტის ცვლილებებიც. როდესაც დავასრულებთ სამუშაოებს, ქუჩა იქნება მოწესრიგებული ველობილიკებით, ტროტუარებით, განათების ბოძებით, ლედ განათებებით და ყველა საჭირო ატრიბუტიკით. ელექტორენერგიის კაბელები მიწაში იქნება გავლებული“, – განაცხადა დედაქალაქის მერმა ლაივ ჩართვისას.
მისი თქმით, რუბრიკა #არაფერიარკეთდება მოსახლეობას მომდევნო დღეებშიც გაგრძელდება. კახა კალაძე თბილისის სხვადასხვა წერტილიდან ჩაერთვება სოციალური ქსელის მომხმარებელს.