თბილისის ზოოპარკში მომავალი წლიდან ჟირაფების ვოლიერის მშენებლობა დაიწყება, ეს კი იმას ნიშნავს, რომ, ბოლოს და ბოლოს, ასრულდება საქართველოში ფაუნის მრავალი თაობის მოყვარულთა ოცნება: ჟირაფების – ამ ფანტასტიკური არსებების – ნახვა შესაძლებელი იქნება საქართველოდან გაუსვლელად!
საქმე ის არის, რომ ორიოდე დღის წინ თბილისს ესტუმრა ზოოპარკების ცნობილი ჰოლანდიელი დიზაინერი ერიკ ფონ ფლიტი, რომელიც თბილისის ზოოპარკის ადმინისტრაციას ახალი ზოოპარკის დაგეგმვაში ეხმარება.
თბილისის ზოოპარკის მიერ გავრცელებული ინფორმაციით, ჰოლანდიელი სპეციალისტი კმაყოფილი დარჩა ახალი ზოოპარკის მდებარეობით, მისი ლანდშაფტით, ხედებითა და სივრცით.
„რით იქნება ახალი ზოოპარკი ძველისგან განსხვავებული? ერიკ ფონ ფლიტის თქმით, ძველი ყაიდის ზოოპარკებში ხალხს ცხოველებისადმი ნაკლები პატივისცემა ჰქონდა. ახალი კონცეფციის ზოოპარკებში, სადაც ცხოველებს აქვთ დიდი სივრცე, არ არსებობს ხელისშემშლელი ბარიერები და ცხოველები ბუნებრივთან მიახლოებულ გარემოში ბინადრობენ, ადამიანებს მეტი მოწიწება უჩნდებათ მათ მიმართ. ზუსტად ამგვარ ვოლიერებს გვიგეგმავს ბატონი ფლიტი. ამჟამად აფრიკის სავანაზე მუშაობს. ზოოპარკის ახალ ტერიტორიაზე აფრიკის ექსპოზიცია დაახლოებით ათ ჰექტარს დაიკავებს. ძველი ზოოპარკი სულ ხუთი ჰექტარია. ახალი ზოოპარკის ერთი ვოლიერი ძველზე ორჯერ დიდი იქნება და ამ სივრცეში ჰიპოპოტამი, მარტორქა, ზებრები, სხვადასხვა სახეობის ანტილოპები და ყველასთვის სანატრელი ჟირაფები დაიდებენ ბინას“, – ვკითხულობთ თბილისის ზოოპარკის ადმინისტრაციის მიერ გავრცელებულ განცხადებაში.