პრაღის ფორმატში რუსეთის წარმომადგენელმა გრიგორი კარასინმა ზურაბ აბაშიძესთან შეხვედრის შემდეგ განაცხადა, რომ შეხვედრაზე განხილვის ერთ-ერთი თემა ექიმ ვაჟა გაფრინდაშვილის საკითხი იყო და მან იმედი გამოთქვა, რომ გაფრინდაშვილი მალე დაუბრუნდება ოჯახს.
რუსი დიპლომატის თქმით, საკითხის მოსაგვარებლად კომუნიკაცია ჰქონდათ როგორც ქართულ, ასევე ოსურ მხარესთან. ამასთან კარასინის თქმით, მისი მხრიდან გაჟღერდა აზრი, რომ მოქმედება ხდებოდეს მუდმივად ჟენევის დისკუსიების ჩარჩოებში და ეფექტურად, მიზანმიმართულად იქნეს გამოყენებული, როგორც არსებული მექანიზმები ასევე, ჟენევის დისკუსიების თანათავმჯდომარეების ვიზიტებიც:
“საუბრის დასაწყისში ზურაბ აბაშიძემ წამოჭრა ექიმ ვაჟა გაფრინდაშვილის საკითხი. ჩვენ საქმის კურსში ვიყავით. გვქონდა კონტაქტი, როგორც ქართულ, ასევე ოსურ მხარესთან სხვადასხვა დონეზე. იმედი გვაქვს, ეს პრობლემა უახლოეს პერიოდში გადაიჭრება, მაგრამ, ამავდროულად, ჩვენი მხრიდან გაჟღერდა აზრი იმის თაობაზე, რომ მუდმივად უნდა ვმოქმედებდეთ ჟენევის დისკუსიის ჩარჩოებში. სხვადასხვა მექანიზმების ფარგლებში, რომლებიც არსებობს. უნდა ვაიძულოთ, იმუშაონ ინსტრუმენტებმა, ცხელმა ხაზმა. საჭიროა სოხუმსა და ცხინვალში, თბილისში ჟენევის დისკუსიის თანათავმჯდომარეების ვიზიტების უფრო მიზანმიმართულად გამოყენება. თუ ეს ინსტრუმენტები იმუშავებენ, ჩვენ გარანტია გვექნება, რომ ასეთი დრამატული შემთხვევები აღარ განმეორდება. უნდა იურთიერთონ სხვადასხვა უწყებებმა, მაგალითად, მე და ზურაბი ვურთიერთობთ, ვმსჯელობთ, გვაქვს კონტაქტი, საგარეო საქმეთა სამინისტროები მუშაობენ ერთმანეთთან, მაგრამ ეს საკმარისი არ არის. ასეთი შემთხვევა აღარ უნდა განმეორდეს, ხოლო გაფრინდაშვილის პრობლემა, ვფიქრობ, უახლოეს მომავალში გადაიჭრება. ვფიქრობ, ის იქნება უახლოეს დღეებში სახლში, მაგრამ რადგანაც გაფრინდაშვილი იმყოფება სამხრეთ ოსეთის ტერიტორიაზე, ამაზე უნდა ჰკითხოთ მათ, ვინც იქ იღებს გადაწყვეტილებებს. თუმცა იმედი მაქვს, ასეთ გადაწყვეტილებას მიიღებენ და გაფრინდაშვილი მალე დაუბრუნდება თავის ოჯახს. ამისთვის ვიყენებთ მთელ ჩვენს კონტაქტებს. მოდით, დაველოდოთ,”– განაცხადა გრიგორი კარასინმა.