მოძრაობა „შეცვალეს“ წევრები აგრძელებენ წერტილოვან დარტყმებს ყველა იმ ადგილზე, სადაც ხელისუფლების წარმომადგენლები იმყოფებიან.
ცოტა ხნის წინ პარლამენტთან შეკრებილები დაიძრნენ ეროვნული ბიბლიოთეკისკენ, სადაც იუსტიციის მინისტრი თეა წულუკიანი იმყოფება.
„აქციის მონაწილეებმა აქ გადმოინაცვლეს და ცდილობენ შესასვლელის ბლოკირებას. შესაბამისად, სამართალდამცველები მობილიზებულები არიან, დგას პოლიციის კორდონი და ყველას მოვუწოდებთ, რომ მშვიდ ვითარებაში გამოხატონ პროტესტი. ამ ხალხის რაოდენობა ბიბლიოთეკაში, ბუნებრივია, ვერ შევა. აქციის მონაწილეები ვერ განახორციელებენ ისეთ ქმედებებს, რომლების სხვა ღონისძიების ჩაშლაზეა მიმართლი“, – განაცხადა საპატრულო პოლიციის უფროსმა ვაჟა სირაძემ.
აქციაზე მცირე ინციდენტიც მოხდა, როდესაც „ევროპული საქართველოს“ ერთ-ერთმა ლიდერმა, დეპუტატმა გიგა ბოკერიამ პოლიციის კორდონის გარღვევა სცადა, თუმცა სამართალდამცველებმა მას ამის საშუალება არ მისცეს.
პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.
14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.
მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება – კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.