ქუთაისში „ქართული ოცნების“ მხარდამჭერებმა „ნაციონალური მოძრაობის“ ოფისი დააბოქლომეს, სადაც ოპოზიციის წევრები იმყოფებოდნენ.
მოგვიანებით სიტუაცია რამდენჯერმე დაიძაბა, რასაც დაპირისპირება მოჰყვა. მანამდე „ქართული ოცნების“ წევრება და მხარდამჭერებმა პროტესტის ნიშნად ოფისს კვერცები და ცოცხები დაუშინეს. ადგილზე მობილიზებულია პოლიცია. ამ დროისთვის „ნაციონალური მოძრაობის“ ოფისი დაკეტილია.
დღესვე გაერთიანებული ოპოზიციის მიერ ქუთაისში „ქართული ოცნების“ ოფისის დაბოქლომებას სიტყვიერი და ფიზიკური დაპირპისპირება მოჰყვა. ოპოზიციის წარმომადგენლები მმართველი გუნდის ოფისთან მივიდნენ და კარს ბოქლომი დაადეს. ამის შემდეგ კი „ქართული ოცნების“ წევრები ოფისიდან გამოვიდნენ, რასაც დაპირისპირება მოჰყვა. ადგილზე ვითარება სამართალდამცველებმა განმუხტეს.
პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.
14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.
მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება – კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.