თავდაცვის მინისტრმა ირაკლი ღარიბაშვილმა შინდისის ბრძოლაში დაღუპული მიხეილ დვალიშვილის ოჯახს გადასცა მიხეილის ავტომობილი, რომელიც 11 წელი საბაჟო ტერმინალზე იდგა. 2008 წლის ივლისში მიშიკოს მანქანა ჩამოუყვანია, მაგრამ განბაჟების ვადის გასვლის გამო პატრულმა ჩამოართვა და საბაჟო ტერმინალზე გადაიყვანა.
მიშიკომ ტერმინალის თანამშრომლებს სთხოვა მანქანას მიმიხედეთ, რამდენიმე დღეში დავბუნდებიო. 3 დღეში ომი დაიწყო და მიშიკო შინდისის უთანასწორო ბრძოლაში გმირულად დაიღუპა. მის მამას დავით დვალიშვილს, რომელიც აფხაზეთის ომის ვეტერანია, არ ჰქონია მატერიალური საშუალება, რომ მანქანა განებაჟებია. წინა ხელისუფლებას თხოვა დახმარება, მაგრამ უშედეგოდ. რამდენიმე დღის წინ დავით დვალიშვილი თანამებრძოლ ვეტერანებთან ერთად ფოთში გაემგზავრა დაღუპული მებრძოლის, ალექსანდრე ბუხნიკაშვილის საფლავის მოსანახულებლად. ფოთში მისულებს დავითმა სთხოვა, ერთ-ერთ ტერმინალთან გაევლოთ. შესასვლელთან შინდისფერი ავტომობილი ფორდ მონდეო დახვდათ. ავტომობილის დანახვისთანავე დავითს ცრემლები წამოუვიდა. მოგვიანებით ვეტერანებმა თავდაცვის მინისტრს აცნობეს ამ ამბის შესახებ, რომელმაც მანქანა ოჯახს გადასცა.