ამ ოჯახს ჰქონდა საცხოვრებელი სახლი, რომელიც ბაღდათის მერიამ გამოუყო და წლების განმავლობაში იქ ცხოვრობდნენ, რატომ იმყოფებოდნენ ამჟამად ამ სახლში, ამ ეტაპზე ინფორმაცია არ გვაქვს, – ასე უპასუხა იმერეთის რეგიონში სახელმწიფო რწმუნებულმა ძვიად შალამბერიძემ ჟურნალისტების კითხვას, თუ რატომ ცხოვრობდა სოციალურად გაჭირვებული ოჯახი დამწვარ სახლში და იყვნენ თუ არა აღნიშნულის შესახებ ინფორმირებულები.
გუბერნატორის განმარტებით, ხის სახლი ძალიან ძველია და ცეცხლი ადვილად აალდა.
“საშინელი ტრაგედია მოხდა, ასეთი ტრაგედიები ალბათ, არ უნდა ხდებოდეს, ვუსამძიმრებ დაღუპულთა ახლობლებს. ეს იყო მიტოვებული სახლი, სადაც ეს ოჯახი თვითნებურად იყო შესახლებული: დედა, 4 მცირეწლოვანი და ერთი ქალბატონი. ხანძრის გამომწვევი მიზეზი ჯერ-ჯერობით უცნობია, ძალიან ძველი სახლია, ხის და ცეცხლის გავრცელება ძალიან სწრაფად მოხდა. ამ ოჯახს ჰქონდა საცხოვრებელი სახლი, რომელიც ბაღდათის მერიამ გამოუყო და წლების განმავლობაში იქ ცხოვრობდნენ, რატომ იმყოფებოდნენ ამჟამად ამ სახლში, ამ ეტაპზე ინფორმაცია არ გვაქვს”, – თქვა შალამბერიძემ.
შეგახსენებთ, რომ ბაღდათში, წერეთლის ქუჩაზე საცხოვრებელ სახლში ხანძრის შედეგად 6 ადამიანი – დედა, 4 მცირეწლოვანი ბავშვი და ოჯახის ახლობელი ქალი დაიღუპა.