საქართველოს სამი მოქალაქე, რომლებიც ჩინეთიდან ფრენების აკრძალვის გამო საქართველოში ჩამოსვლას ვერ ახერხებდა, ქვეყანაში 9 თებერვალს დაბრუნდება.
როგორც imedinews-ს ეკონომიკისა და მდგრადი განვითარების სამინისტროში განუცხადეს, საქართველოს მოქალაქეები ჩინეთს დღეს ადგილობრივი დროით 23:50 საათზე დუბაის გავლით დატოვებენ და თბილისში 9 თებერვალს 15:50 საათზე ჩამოვლენ. მათ ტრანსპორტირებას „საქართველოს აეროპორტების გაერთიანება“ უზრუნველყოფს.
ბოლო მონაცემებით, ჩინეთში, კორონავირუსით დაღუპულთა საერთო რაოდენობამ 722-ს მიაღწია, ჯამში კი ვირუსის 34 546 დადასტურებული შემთხვევაა გამოვლენილი.
30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს. საქართველოში ვირუსის გავრცელების შანსი მინიმალურია.
რა არის კორონავირუსი და რა რეკომენდაციებს აძლევს მოგზაურებს ამასთან დაკავშირებით დაავადებათა კონტროლის ცენტრი, იხილეთ მითითებულ ბმულებზე.