ირაკლი კობახიძემ „ქრონიკის“ ეთერში ოპოზიციის კრიტიკას უპასუხა. „ქართული ოცნების“ აღმასრულებელი მდივნის თქმით, ოპოზიციამ ბიძინა ივანიშვილის მიერ StopCov ფონდში 100 მილიონის გადარიცხვასთან დაკავშირებითაც მოახერხა კრიტიკული განცხადებების გაკეთება.
„ეს არის ერთგვარი ბოღმა. თუმცა, მე შეგახსენებთ, რომ ბოღმა, პირველ რიგში, მტერია იმ ადამიანის, რომელშიც ეს ბოღმა არის დაგუბებული. აქედან გამომდინარე, მათ მოვუწოდებდი სხვანაირად იმოქმედონ, საკუთარ პოზიციებს, საკუთარ შეხედულებებს სხვანაირად დააკვირდნენ და ამ შემთხვევაში იქნებ შეცვალონ საკუთარი დამოკიდებულება მიმდინარე პროცესების მიმართ. ეს უკავშირდება იგივე ამ 100 მილიონის საკითხს, იგივე ფრენების საკითხს“, – აღნიშნა კობახიძემ.
მისი თქმით, სახელმწიფო, კერძოდ კი საგარეო საქმეთა და ჯანდაცვის სამინისტროები, კოორდინირებულად მუშაობენ როგორც ქვეყანაში, ასევე საზღვარგარეთ მყოფი საქართველოს მოქალაქეების დასახმარებლად, ოპოზიცია კი უსაფუძვლო კრიტიკით პოლიტიკური ქულების დაწერას წარუმატებლად ცდილობს.