რაჭა-ლეჩხუმ- ქვემო სვანეთის სახელმწიფო რწმუნებულის არჩილ ჯაფარიძის განცხადებით, გასულმა ღამემ ლენტეხში მშვიდ ვითარებაში ჩაიარა და თვითიზოლაციის წესების დარღვევის არცერთი ფაქტი არ დაფიქსირებულა.
” მშვიდად ჩაიარა გასულმა ღამემ საკარანტინო ზონაში, არ გამოვლენილა თვითიზოლაციის დარღვევის ან რაიმე მნიშვნელოვანი კანონდარღვევის ფაქტი, რაც მთავარია მოსახლეობაში არ არის პანიკა,გრძელდება დაბა ლენტეხში თერმოსკრინინგი და სადეზინფექციო სამუშაოები.
ახლა, მივდივარ სოფელ მელეში სადაც ადგილზე გავეცნობი პროცესებს, გუშინ ადგილობრივი ოპერაციული შტაბის სხდომაზე ვიმსჯელეთ იმ გამოწვევებზე, რაც ბუნებრივია ასეთ დროს, პროდუქტებით მომარაგების საკითხზე, მედიკამენტების, სხვადასხვა საინფორმაციო საშუალებასა თუ იმ აუცილებლობებზე, რაც მოსახლეობისთვის საჭიროა.
ინფიცირებული 5 პიროვნების კონტაქტების რაოდენობა არის 100-მდე. როგორც სპეციალისტები მეუბნებიან, ისინი არიან მკაცრ თვითიზოლაციაში. ამ დროისათვის ლენტეხსა და ცაგერში ვირუსისთვის დამახასიათებელი სიმპტომები არ აქვთ
ყველა ის საშუალება და აუცილებლობა ამ ეტაპზე არის მუნიციპალიტეტში, რაც მოსახლეობისთვის საჭიროა.
მედიკოსებმა დაიწყეს ლენტეხის სოფლებში პირველივე შემთხვევიდან კარდაკარ შემოვლა, ინფორმაციით მომარაგება მოსახლეობის, ამ ეტაპისთვის ათასამდე ადამიანია შემოწმებული.
რაც შეეხება კარანტინს ლენტეხში, გაგრძელდება შეზღუდვები მანამ, სანამ იქნება აუცილებლობა ამისა, სანამ არ მოიხსნება საფრთხეები“, – განაცხადა ჯაფარიძემ.