ანალიტიკოსი გია აბაშიძე სოციალურ ქსელში წერილს აქვეყნებს, რომელსაც უცვლელად გთავაზობთ:
„ოპოზიციის გაჭედილ “გრამოფონზე”, ე.წ. პოლიტპატიმრებზე:
რეალობა ამგვარია – “ნაციონალური მოძრაობა” და განშტოებები PSR ტესტების მსგავსად, უაზრო განმეორებით მოითხოვენ, რომ მმართველმა პარტიამ ხელისუფლების სამივე შტოს დაავალოს პატიმრობიდან გაათავისუფლონ მძიმე დანაშაულებში მსჯავრდებული და ბრალდებული სამი პირი. ამ პირთა მძიმე პოლიტიკური და კრიმინალური წარსულის შესახებ საყოველთაოდ ცნობილია საქართველოში.
ცხადია, ეს განვითარებულ სამყაროში არ ხდება, რადგანაც სამართლებრივ სახელმწიფოში ხელისუფლება დემოკრატიული ინსტიტუტების საქმიანობაში პოლიტიკურად არ ერევა. ეს უკანონო ზეგავლენა და დანაშაულია, რასაც არ ჩაიდენს “ქართული ოცნების” ხელისუფლება.
როგორ გგონიათ ამაზე რამე სერიოზული საუბარი იქნებოდა უცხოელი დიპლომატების თანდასწრებით და მით უმეტეს ამაზე შედგებოდა რაღაც შეთანხმება? არა და არა!
ამიტომაც მოუწოდა დღეს, პარლამენტის თავმჯდომარემ ელჩებს, რომ კიდევ ერთხელ, უფრო მკაფიოდ განმარტონ და საჯაროდ გვითხრან თუ რა წერია 8 მარტის შეთანხმებაში. ნეიტრალურმა დასავლელმა არბიტრებმა უნდა გვითხრან გულისხმობს თუ არა ის შეთანხმება უკანონო, პოლიტიკურ ზეგავლენას დამოუკიდებელ ინსტიტუტებზე.
რა თქმა უნდა, მსგავს უკანონობაში ელჩები მონაწილეობას არც მიიღებდნენ და შესაბამისად, ვერც დაადასტურებენ.“