გიორგი რურუას სასამართლო სხდომაზე ხმაური იყო. სიტყვიერი დაპირისპირება ბრალდებულსა და პროკურორებს შორის მოხდა.
პროცესზე იკითხებოდა ექსპერტ-კრიმინალისტი, რომელმაც ექსპერტიზა ჩაუტარა გიორგი რურუას იმ ავტომობილს, რომლიდანაც ბრალდების მხარის ინფორმაციით, ცეცხლსასროლი იარაღი ამოიღეს. გიორგი რურუა კითხვებს უსვამდა მოწმეს, რა დროსაც პროკურორებმა მას მიუთითეს, რომ კითხვები დაეკონკრეტებინა. სწორედ ამ დროს მოხდა შეკამათება გიორგი რურუასა და პროკურორებს შორის. მოსამართლემ გიორგი რურუას კორექტულობისკენ მოუწოდა.
„ერთ-ერთი პროკურორი, რომელიც აგრესიულად იყო განწყობილი, დაგვიწყო ყვირილი და ამას მოჰყვა სიტუაციის გამწვავება. მათ ავიწყდებათ, რომ მათი სტატუსი ავალდებულებთ, ეთიკურად მოიქცნენ. მით უმეტეს, სადაც ჩადებულია იარაღი, იმ საქმეზე მათი მხრიდან აგრესიულობა უტიფრობაა. ეს იყო სიტუაციის გამწვავების მიზეზი. გინებას არ ჰქონდა ადგილი, იყო უბრალოდ ხმამაღალი საუბარი და განიმუხტა სიტუაცია“, – განაცხადა ადვოკატმა, დიმიტრი საძაგლიშვილმა.