“თიბისი ბანკმა“ “ბანკი რესპუბლიკა“, ასევე “პროგრესბანკის“ აქტივებისა და პასივების ნაწილი შეისყიდა

„თიბისი ბანკმა“ „ბანკი რესპუბლიკა“, ასევე „პროგრესბანკის“ აქტივებისა და პასივების ნაწილი შეისყიდა. როგორც ”კვირას“ „თი ბი სი ბანკის ‘ პრესსამსახურიდან აცნობეს, ამ გარიგებით ”თი ბი სი ბანკი” ბაზარზე დეპოზიტებისა და სესხების მიხედვით N 1 ბანკი ხდება.
”თი ბი სი ჯგუფმა” და ფრანგულმა „სოსიეტე ჟენერალმა“ ხელი მოაწერეს შეთანხმებას, რომლის თანახმადაც ”თი ბი სი ბანკმა” „ბანკი რესპუბლიკის“ აქციების 93.7% 315 მილიონ ლარად შეიძინა. ეს ტრანზაქცია უდიდესია ქართული საბანკო სექტორის ისტორიაში და წარმოადგენს უმნიშვნელოვანეს მოვლენას საქართველოს ფინანსურ ბაზარზე.
„ბანკი რესპუბლიკის“ შეძენა სრულად შეესაბამება ”თი ბი სი ბანკის” სტრატეგიას და იძლევა უდიდეს შესაძლებლობას, მნიშვნელოვანი სინერგისთვის, ვინაიდან „ბანკი რესპუბლიკა“ არის მყარი ფინანსური ინსტიტუტი, რომელიც ლიდერი ბანკების ხუთეულში შედის და განსაკუთრებულ აქცენტს იპოთეკურ და სამომხმარებლო სესხებზე აკეთებს. მისი ამონაგები კაპიტალზე 2013 წლიდან ყოველ წელს შეადგენდა 18%- ს, ხოლო 2015 წელს – 21 %-ს.
”თი ბი სი ბანკმა” „ბანკი რესპუბლიკის“ აქციების 93.7 %-ი („სოსიეტე ჟენერალის“ 100 %-იანი წილი) 315 მილიონ ლარად გამოისყიდა. ამ თანხის 70 % გადახდილი იქნება ნაღდი ანგარიშსწორებით, ხოლო 30 % ”თი ბი სი ბანკის” ახლად გამოშვებული აქციებით. შედეგად, ჯგუფი „სოსიეტე ჟენერალი“ ხდება ”თი ბი სი ბანკის” აქციების 5.4 % – ის მფლობელი. მხარეები ასევე შეთანხმდნენ საქართველოში სამომავლო თანამშრომლობის გაღრმავებაზე”, – განმარტავენ ბანკში.
მათივე ცნობით, რაც შეეხება „ბანკი რესპუბლიკის“ აქციების დარჩენილ 6.27 %-ს, რომელიც „ევროპის რეკონსტრუქციისა და განვითარების ბანკს“ ეკუთვნის, ”თი ბი სის” უკვე დაწყებული აქვს მოლაპარაკებები ამ აქციების გამოსყიდვაზე.
”შერწყმის შედეგად: ”თი ბი სი ბანკი” ხდება N1 ბანკი საქართველოში სესხებისა და დეპოზიტების მიხედვით. ”თი ბი სი ბანკის” ბაზრის წილი მთლიან სესხებში იზრდება 7.3 % -ით და აღწევს 35.7 %-ს, ხოლო დეპოზიტებში იზრდება 5.3 %-ით და შეადგენს 34.5 %-ს; ”თი ბი სი ბანკის” პოზიციები ყველა საოპერაციო სეგმენტში ძლიერდება, განსაკუთრებით კი საცალო საბანკო მომსახურების მიმართულებით; კლიენტების რაოდენობა მიუახლოვდება 2 მილიონს; კიდევ უფრო გაფართოვდება ”თი ბი სი ბანკის” მომსახურების ქსელი; მთელი საქართველოს მასშტაბით, ფილიალების რაოდენობა გაიზრდება 169-მდე, ხოლო ბანკომატების – 517-მდე; ”თი ბი სი ბანკი” ძლიერდება მაღალკვალიფიციური კადრებით, რომელთაც საბანკო საქმიანობაში დიდი გამოცდილება და მომხმარებელთან ურთიერთობის საუკეთესო პრაქტიკა აქვთ”, – განმარტავენ ბანკში. მათივე ინფორმაციით, ტრანზაქციის დასრულება დაგეგმილია 2016 წლის ბოლომდე.
აღნიშნულ გარიგებაში ”თი ბი სი ბანკის” ექსკლუზიური ფინანსური მრჩეველია J.P.Morgan, ხოლო Baker and Mckenzie LLP -საერთაშორისო მრჩეველი იურიდიულ საკითხებში.
„ჩვენ დარწმუნებული ვართ, რომ „ბანკი რესპუბლიკის“ ყიდვის გადაწყვეტილება სრულ შესაბამისობაშია ”თი ბი სი ბანკის” გრძელვადიან სტრატეგიასთან და წარმოადგენს წინგადადგმულ ნაბიჯს ჩვენი მიზნების შესასრულებლად, რომ გავხდეთ ლიდერი ბანკი საქართველოსა და კავკასიის რეგიონში.
”თი ბი სი ბანკის” მენეჯმენტის გუნდს აქვს უნიკალური გამოცდილება ამ ტიპის ინტეგრაციებში და გვაქვს სათანადო რესურსი, რომ ამ ორი ბიზნესის შერწყმით მომხმარებლებს საუკეთესო სერვისი შევთავაზოთ. ჩვენ მოუთმენლად ველით ჩვენს გუნდში „ბანკი რესპუბლიკის“ თანამშრომლებს, რომლებიც დაგვეხმარებიან წარმატებულად გავაგრძელოთ საბანკო საქმიანობა და შევთავაზოთ კლიენეტებს საუკეთესო მომსახურება, ახლა უკვე როგორც ყველაზე დიდმა ბანკმა საქართველოში. ჩვენ საერთო მიზნები გვაქვს და მოხარული ვართ, რომ მოგვეცემა შესაძლებლობა ერთად გავიზარდოთ და განვვითარდეთ“, – აცხადებს ”თი ბი სი ბანკის” გენერალური დირექტორი ვახტანგ ბუცხრიკიძე.
”თი ბი სი ბანკში” აცხადებენ, რომ ბანკი შეიძენს სს „პროგრესბანკის“ აქტივების (108 მილიონი ლარი) და პასივების (108 მილიონი ლარი) შერჩეულ ნაწილს. ”თი ბი სი ბანკისთვის” ეს ტრანზაქცია წარმოადგენს საერთო აქტივების 1.6 %-ს.
”თი ბი სი ბანკისა” და „ბანკი რესპუბლიკის“ კონსოლიდაციას მყარი ინდუსტრიული ლოგიკა აქვს და საქართველოს საბანკო სექტორს მოუტანს მნიშვნელოვან სარგებელს ლიდერობისა და მომსახურების გაუმჯოსების თვალსაზრისით. მოხარული ვართ, რომ ჩვენი აქციები გადავეცით ისეთ მოტივირებულ პროფესიონალთა გუნდს, როგორიც არის“ თი ბი სი ბანკის „ მენეჯმენტი. გვჯერა, რომ საუკეთესო პარტნიორი შევარჩიეთ ჩვენი შვილობილისთვის საქართველოში. ჩვენ მოუთმენლად ველით ტრანზაქციის წარმატებით დასრულებას და მზად ვართ, ვითანამშრომლოთ, რომ გარდამავალი პერიოდი უმტკივნეულოდ წარიმართოს“, – აცხადებს „ბანკი რესპუბლიკის“ გენერალური დირექტორი ანტუან გაბიზონი.