პარლამენტის თავდაცვისა და უშიშროების კომიტეტის თავმჯდომარის ირაკლი სესიაშვილის განცხადებით, სამწუხაროდ, საქართველოში ჯერ კიდევ არსებობენ ის პოლიტიკოსები, რომლებიც ფიქრობენ, რომ შეიძლება შტურმი მიიტანო პარლამენტზე, დაამხო, პოლიციელზე იძალადო და შემდეგ ამას პოლიტიკური ნიშანი მიაწერო.
სესიაშვილის თქმით, 20 ივნისი მმართველი გუნდისთვის მტკივნეული თარიღია ერთი მხრივ იმის გამო, რომ მოქალაქეებმა ჯანმრთელობის მძიმე დაზიანება მიიღეს, ასევე წინა ხელისუფლებისგან განსხვავებით, ეს ყველაფერი „ქართული ოცნებისთვის“ რიგითი მოვლენა არ არის.
„20 ივნისი ძალიან მტკივნეული დღეა თითოეული ჩვენგანისთვის. ერთი, რომ ჩვენმა მოქალაქეებმა ჯანმრთელობის მძიმე დაზიანება მიიღეს და თუ კი წინა ხელისუფლებისთვის ეს ყოველდღიურ, რიგით მოვლენას წარმოადგენდა, ჩვენთვის ეს ერთი დღე ძალიან მძიმეა.
მძიმე არის ასევე ეს დღე იმიტომ, რომ სამწუხაროდ, ამ ქვეყანაში ჯერ კიდევ არსებობენ ის პოლიტიკოსები, რომელთაც თავში მოსდით აზრად, რომ ძალადობრივად შეიძლება შტურმი მიიტანო პარლამენტზე, დაამხო, პოლიციელს ჩაარტყა, სამი საათის განმავლობაში ეძალადო და შემდეგ ამ ძალადობას რაღაც პოლიტიკური ნიშანი მიაწერო, ეს ტრაგედიაა პოლიტიკური კულტურის თვალსაზრისით“,- განაცხადა სესიაშვილმა.