„გაკვირვებული ვარ, რომ ამ სასტიკ მკვლელებს კიდევ ჰყავთ მხარდამჭერები – ჩემთვის ისინიც მკვლელები არიან!“ – ამის შესახებ გაზეთ „ასავალ-დასავალთან“ შმაგი აფრასიძის ქალიშვილმა ლედი აფრასიძემ განაცხადა.
ლედი აფრასიძის განცხადებით, გია ბარამიძე ეცერში იმყოფებოდა და სპეცოპერაციას პირადად ხელმძღვანელობდა. მისი თქმით, სპეცოპერაციის ჩატარება, გია ბარამიძეს სტატუსის ასამაღლებლად სჭირდებოდა, ხოლო სააკაშვილს – „სატრაბახოდ“.
„თავს დილაუთენია დაგვესხნენ, ასე 7 საათისათვის, როდესაც ყველას გვეძინა და ვერტმფრენებიდან გახსნეს ცეცხლი! ეცერში ორი სახლი იდგა გვერდიგვერდ: ერთში ბაბუაჩემი იყო შვილებთან ერთად, მეორეში კი – ჩვენი ოჯახი ბავშვებით და ქალებით! როდესაც სროლა დაიწყეს, ბაბუაჩემი გარეთ გამოვიდა ბავშვებთან ერთად ხელებაწეული, რომ აღარ ესროლათ, მაგრამ მაინც დაჭრეს, შემდეგ კი სახლს ცეცხლი წაუკიდეს! არადა, მისი გადარჩენა შეიძლებოდა… სახლთან ერთად ჩაიფერფლა!
რა საჭირო იყო არმიისა და ავიაციის ამოყვანა, თუ ბიძაჩემისა და მამაჩემის დაკავება სურდათ, ეს ყოველ წუთს შეეძლოთ, რადგან ისინი ძებნილებიც არ ყოფილან და თავისუფლად დადიოდნენ სოფელში!
გიორგი ბარამიძე, რომელიც მაშინ შინაგან საქმეთა მინისტრი იყო, ცრუობს და ამბობს, აფრასიძეებმა წინააღმდეგობა გაგვიწიეს და იმიტომაც გავუხსენით საპასუხო ცეცხლიო! ბავშვებით სავსე სახლიდან ვინ დაიწყებდა სროლას?!
ეს იყო საჩვენებელი სისასტიკე მთელი ქვეყნის დასატერორებლად, რათა ბარამიძეს „რკინის მინისტრის“ იმიჯი მოეპოვებინა, სააკაშვილს კი ეტრაბახა – აი, როგორ მტკიცედ ვებრძვით დამნაშავეთა სამყაროსო!
ბარამიძე დღემდე ცრუობს, ეცერში საერთოდ არ ვყოფილვარო! ის იქ იყო და პირადად ხელმძღვანელობდა იმ სასაკლაოს! კუბდარის ისტორიაც მეზობლებმა საკუთარი თვალით ნახეს და მოისმინეს! ისე კი, ბარამიძემ, სანამ დრო აქვს, მოინანიოს და აღიაროს ყველაფერი, რადგან ჩვენი ოჯახის ამოწყვეტისთვის აუცილებლად აგებს პასუხს!
პასუხი უნდა აგოს სააკაშვილმაც, რომელმაც თავად აღიარა ტელეკამერის წინ – დიახ, მე გავეცი ბრძანება ავიაციის ასაფრენად და აფრასიძეების დასაბომბადო! ისიც ფაქტია, როცა სახლიდან გამოგვიყვანეს, ჩემმა ძმამ თავად იხილა ბიძაჩემ ომეხზე წიხლებით შემდგარი ერთ-ერთი სპეცრაზმელი, რომელმაც ოქროს ბეჭდის მოსაძრობად თითი მოაჭრა!
ამ მკვლელებმა იცოდნენ, რომ სახლში ბავშვები იყვნენ – აკი, ჩვენი კივილის ხმა ცას სწვდებოდა და მაინც გვცხრილავდნენ ვერტმფრენებიდან! „ნაცმოძრაობა“ მკვლელების ბანდაა, რომლის ადგილიც პარლამენტში კი არა, საბრალდებო სკამზეა!
გაკვირვებული ვარ, რომ ამ სასტიკ მკვლელებს კიდევ ჰყავთ მხარდამჭერები – ჩემთვის ისინიც მკვლელები არიან!“ – განაცხადა ლედი აფრასიძემ გაზეთ „ასავალ-დასავალთან“ ინტერვიუში.