ეროვნული ბიბლიოთეკის დირექტორი, გიორგი კეკელიძე ბოლო დროს ახალგაზრდების გარდაცვალების გახშირებულ შემთხვევებს ეხმაურება და საკუთარ “ფეისბუქზე” ვრცელ პოსტს აქვეყნებს.
როგორც კეკელიძე წერს, ასეთი ტრაგიკული შემთხვევები იმდენად გახშირდა, რომ შესაძლოა ეს ყველაფერი საზოგადოებისთვის უკვე ჩვეულ ამბად იქცეს.
“მთელი დღეა ჯავახეთის მთიანეთში ჩვეულად დავხეტიალობ – წიგნებით და მომარაგებული სიტყვებით – რომ განათლება გადაგვარჩენს, რომ ცოდნა გვიხსნის. ვლაპარაკობ და ვხვდები – მაინც გულსგარეთაა ეს ლაპარაკი, მაინც იმისთვის ვაგრძელებ სათქმელს, რომ ამ ახალგაზრდა გოგოს სიკვდილის ცნობას ვისხლეტ და ვიშორებ. ადამიანი ვარ, მზაფრავს და მაშინებს ასეთი ამბები. მაშინებს და თითქოს მეც მკლავს. ერთი, ორი, სამი, ათი. ახალგაზრდა. ახალგაზრდა. ახალგაზრდა. მკვლელობა. მკვლელობა. მკვლელობა. იქ გაჩერებული სიცოცხლე, სადაც წესით იწყებოდა. იქ ჩამოშვებული ფარდა და ფარდის აქეთ, ჩვენ – ,,ველოდებით ექსპერტიზის შედეგებს”. ფარდის იქით კი არავინ არაფერს ელოდება. დუმილია და გაჩერებული სიცოცხლე, იქ, სადაც, წესით იწყებოდა. მერე, თუ კიდევ დაემატა და დაემატა, ერთ დღესაც მართლა ავისხლეტთ ასეთ ამბებს. ვეღარ გავუმკლავდებით. საშიშია ეს. ძალიან. სიკვდილი საბითუმო არ უნდა გახდეს. გაჩვეულებრივებული სიკვდილი ყველაზე საშიშია. მით უფრო მისი, ვისი სიცოცხლეც, ვიტყვი მესამედ, ხვალ იწყებოდა”, – წერს კეკელიძე.