ბაჩალიაშვილების ოჯახი მთავარ პროკურორს თითქმის ერთი საათის განმავლობაში ხვდებოდა. ოჯახი ირაკლი შოთაძესთან გამართული შეხვედრით კმაყოფილია.
როგორც გარდაცვლილი თამარ ბაჩალიაშვილის დედა განმარტავს, მათ საქმის პროკურორის შეცვლა მოითხოვეს, რაზეც მთავარი პროკურორისგან თანხმობა მიიღეს. თეონა თამაზაშვილის თქმით, მათ კითხვებზე დამაკმაყოფილებელი პასუხები მიიღეს, თუმცა რა საკითხებზე ჰქონდა ოჯახს კითხვები, ბაჩალიაშვილის დედამ არ დააკონკრეტა.
ოჯახის ადვოკატის ინფორმაციით, მთავარ პროკურორთან მომდევნო შეხვედრა ორშაბათს დაიგეგმა.
13 აგვისტოს თამარ ბაჩალიაშვილის დედამ, თეონა თამაზაშვილმა მედიასაშუალებებით განცხადება გააკეთა. გარდაცვლილის დედის თქმით, მასზე პროკურორის მხრიდან ზეწოლა განხორციელდა. როგორც თამაზაშვილმა აღნიშნა, პროკურორი საეჭვოდ მიიჩნევდა ადვოკატად მიხეილ რამიშვილს და კითხულობდა, თუ რატომ იცავს ოჯახს რამიშვილი და რა ჰონორარს იღებს ის.