არ ვიცი, რამდენ ხმას მიიღებს ირაკლი ოქრუაშვილი – მას ჩვენს მხარდამჭერებთან არასდროს უსაუბრია, თუმცა დარწმუნებული ვარ, რომ მისი წარსული საქმიანობა ნაწილისთვის მიუღებელი იქნება, – ამის შესახებ „გირჩის“ ლიდერმა, ზურაბ ჯაფარიძემ განაცხადა.
მისივე თქმით, „გირჩის“ მხარდამჭერების ხმების მიღება მხოლოდ კანდიდატებზე იქნება დამოკიდებული და მნიშვნელოვანია, რომ შეთანხმება რაც შეიძლება მეტ ოლქზე გავრცელდეს.
„იმედი მაქვს, რომ ოპოზიციის საერთო კანდიდატი ვიქნები. მნიშვნელოვანია, რომ შეთანხმება გავრცელდეს რაც შეიძლება მეტ ოლქზე, თუმცა ეს საკითხი, ისევე როგორც საბურთალოზე ირაკლი ოქრუაშვილის კანდიდატურის საკითხი, დღეს უნდა განვიხილოთ. „გირჩის“ მხარდამჭერების ხმების მიღება მხოლოდ კანდიდატებზე იქნება დამოკიდებული – არიან კანდიდატები, რომლებიც, ჩემი აზრით, „გირჩის“ ხმების დიდ ნაწილს აიღებენ, მაგრამ არიან კანდიდატები, რომლებიც მათი წარსულიდან და განცხადებებიდან გამომდინარე ხმებს ვერ მიიღებენ. არ ვიცი, რამდენ ხმას მიიღებს ირაკლი ოქრუაშვილი – მას ჩვენს მხარდამჭერებთან არასდროს უსაუბრია, თუმცა დარწმუნებული ვარ, რომ მისი წარსული საქმიანობა ნაწილისთვის მიუღებელი იქნება“, – განაცხადა ზურაბ ჯაფარიძემ.