კორონავირუსით ინფიცირებულმა ქალმა, რომელსაც ვირუსი ზუგდიდის ერთ-ერთ სასტუმროში ყოფნისას დაუდასტურდა, სავარაუდოდ, თბილისი-ზუგდიდის ჩქაროსნული მატარებლით იმგზავრა. ამის შესახებ ინფორმაციას „კურიერი“ აქვეყნებს.
სამეგრელო-ზემო სვანეთის სახელმწიფო რწმუნებულის მოვალეობის შემსრულებელმა ნინო ვიბლიანის განცხადებით, მასთან კონტაქტში მყოფი ორ პირი თვითიზოლაციაშია და მათი ნიმუშები ტესტირებისთვის ლაბორატორიაში უკვე გადაგზავნილია.
ზუგდიდის სასტუმროს წარმომადგენლის, სოფიო ხუბულავას განცხადებით, სასტუმროში შესაბამისი სადეზინფექციო სამუშაოები უკვე ჩატარდა. მისივე განცხადებით, ქალი სასტუმროში მხოლოდ რამდენიმე საათის განმავლობაში იმყოფებოდა.
„28-ში, მარიამობას შემოვიდა ეს ქალბატონი. მოაკითხეს რამდენიმე საათში, აუღეს ტესტი. მოაკითხეს საღამოს, ალბათ, 3 საათისთვის და გადაიყვანეს საგანგებო სამსახურიდან. სიცხე ან რამე სხვა სიმპტომი არ ჰქონდა,“-განაცხადა სოფიო ხუბულავამ.
ინფიცირებული ქალი რუხის სამედიცინო დაწესებულებაში გადაიყვანეს. ექიმების ინფორმაციით, მისი ჯანმრთელობის მდგომარეობა დამაკმაყოფილებელია.