კორონავირუსის გავრცელების შემცირების მიზნით, ბელგიაში 13 დეკემბრამდე ლოკდაუნი დაწესდება. აღნიშნული გადაწყვეტილება 8-საათიანი შეხვედრის შემდეგ მიიღეს, რომელსაც პრემიერ-მინისტრი ხელმძღვანელობდა.
ახალი წესების თანახმად, დაიხურება ყველა მაღაზია, სუპერმარკეტებისა და აფთიაქების გარდა. დეკემბრამდე ასევე დაიკეტება სილამაზის სალონები, რადგან სპეციალისტების აზრით, სალონებში ძალიან რთულია დისტანციის დაცვა და ვირუსის გავრცელების რისკი მაღალია.
გარდა ამისა, იკრძალება სახლში ერთი სტუმრის მიღებაც კი. ღია სივრცეში ნებადართულია მხოლოდ 4 ადამიანის შეკრება. გაზაფხულზე გამოცხადებული ლოკდაუნის მსგავსად, დაიკეტება ზოოპარკები და პარკები. დაკრძალვის ცერემონიაზე დასწრება ნებადართულია მხოლოდ 15 ადამიანისთვის.
მკაცრი ზომების დაწესების მიუხედავად, ევროკავშირის წევრი ქვეყნებისთვის ბელგია საზღვარს არ კეტავს. მოგზაურობა დაშვებულია იმ წესებით, რაც ევროკომისიის რეკომენდაციებით მიიღეს: მგზავრის სპეციალური ფორმა, წითელი ზონიდან დაბრუნების შემდეგ სიმპტომების შემთხვევაში ტესტირების გავლა და 10-დღიანი თვითიზოლაცია. ბელგიიდანაც დაშვებულია ევროკავშირის წევრ ქვეყნებში მგზავრობა, მაგრამ სავალდებულოა კოვიდ-19 -ზე ჩატარებული ტესტის წარდგენა, რომელიც გამგზავრებამდე მაქსიმუმ 72 საათით ადრე უნდა იყოს ჩატარებული.
„დღეს გვაქვს მხოლოდ ერთი გამოსავალი და ჯანდაცვის სისტემის მხარდაჭერაა. კონტაქტების შემცირებით დავიცავთ საკუთარ თავს და გადავარჩენთ ჩვენი ოჯახის წევრების,ახლობლების, მეგობრებისა და ხანდაზმულების სიცოცხლეს. ჩვენ ისევ ლოკდაუნზე გადავდივართ და მკაცრ შეზღუდვებს ვაწესებთ იმისათვის, რომ არ მოხდეს ჯანდაცვის სისტემის სრული კოლაფსი. ამ ბრძოლის ბოლოს ჩვენ ყველამ ერთად უნდა მივაღწიოთ გამარჯვებას და ამისათვის გარდაუვალია ფიზიკური კონტაქტის შემცირება“, – განაცხადა ბელგიის პრემიერ-მინისტრმა. ალექსანდრე დე კრომ.
აღსანიშნავია, რომ ბელგიაში გასული დღე-ღამის განმავლობაში კორონავირუსის 23 921 ახალი შემთხვევა დაფიქსირდა. ბოლო 24 საათში გარდაიცვალა 138 ადამიანი. ჯანდაცვის ინსტიტუტის მონაცემებით, უკვე 6187 პაციენტი იმყოფება საავადყოფოში, 1057 ინტენსიური თერაპიის განყოფილებაშია, ხოლო საწოლების მაქსიმუმი, როგორც ჯანდაცვის მინისტრი აცხადებს, 2000 საწოლს შეადგენს.