ეს ჯაჭვი უნდა გაწყდეს, ახლა თბილისში არის ძალიან დიდი რისკი, რომ ყველას დაგვემართოს COVID-19, ეს ჯაჭვი თუ არ გაწყდა, 2500 ინფიცირებულზე ნაკლები არ გვეყოლება არასდროს, – ამის შესახებ ვახტანგ ბოჭორიშვილის კლინიკის გენერალურმა დირექტორმა, დავით გადელიამ „ნამდვილ რიცხვებში“ განაცხადა.
მისი თქმით, ეს ჯაჭვი გაწყდება იმ შემთხვევაში, თუ ყველა ადამიანი პასუხისმგებლობით მოეკიდება საკუთარსა და გვერდით მყოფი ადამიანის ჯანმრთელობას.
„საერთოდ, ქართველი არის კანონმორჩილი და ლეგენდაა ის, რომ ქართველი რაღაცას არ დაიცავს, მშვენივრად ვიცავთ ყველაფერს და კარგადაც გამოვიარეთ ამ ეტაპამდე პამდემია. საზოგადოება პირველ ეტაპზე ძალიან მობილიზებული შეხვდა განსაცდელს, რომელიც ახლა კიდევ უფრო მძიმედ გვიდგას. მართალია, ისეთი არაფერია რომ ვერ გადავრჩეთ, მაგრამ სერიოზული განსაცდელია, რასაც მთელი ერის მობილიზება სჭირდება. სიმართლე გითხრათ, მიკვირს ჯანდაცვის სისტემა ამ რაოდენობის ინფიცირებულების მიღებასაც თუ გაუძლებდა, მაგრამ ახლა ყველაფერი უნდა ვქნათ, რომ ჯაჭვი გაწყდეს“, – განაცხადა დავით გადელიამ.