ძალიან რთულია, ვინმემ იმსჯელოს, რამხელა იყო გაყალბების მასშტაბი, – ამის შესახებ პოლიტიკური გაერთიანება „გირჩის“ ლიდერმა, ზურაბ ჯაფარიძემ საქართველოს პირველი არხის გადაცემაში „კვირის ინტერვიუ“ სტუმრობისას განაცხადა.
„ამ არჩევნებზე პროცედურული დარღვევები გაცილებით მეტი იყო, ვიდრე წინა არჩევნებზე, მაგრამ მთავარი ეს არ არის. მთავარი პრობლემა ისაა, რომ ძალიან რთულია, ვინმემ იმსჯელოს, რამხელა იყო გაყალბების მასშტაბი. თუმცა, რაც ნათლად ჩანს, არის უბნები, სადაც ბიულეტენები მეტია, ვიდრე მოქალაქეთა ხელმოწერები, რაც აჩვენებს, რომ ბიულეტენები ჩაყრილია. არის უბნები, სადაც ბიულეტენები ნაკლებია“, – განაცხადა ჯაფარიძემ.
გადაცემის წამყვანის შეკითხვაზე, თუ ჟვანიას ცესკო სანდო არ არის, რითია მეტად სანდო მურუსიძის სასამართლო და რისი იმედი აქვს ოპოზიციას, რადგან ცესკო-მ ხმების დათვლა უკვე დაასრულა, ზურაბ ჯაფარიძემ განაცხადა, რომ მურუსიძის სასამართლო მეტად სანდო არაფრით არ არის.
„მაგაზე მარტივი პასუხი მაქვს – არაფრით. სინამდვილეში, ჩვენ გვაქვს პრობლემა, რომ ყველა ინსტიტუტი, რომელიც ამ ქვეყანაშია, არის პოლიტიკურად მართული. ამიტომ, სანდოობის თვალსაზრისით, როგორც ცესკო-ს არ აქვს ნდობა, ისე არ აქვს სასამართლოს. მარტივად რომ გითხრათ, სინამდვილეში, ჩიხია. სამართლებრივი გზებით იმის მიღწევა, რომ მიიღო შედეგები, რომელსაც ლეგიტიმაცია ექნება, ამ არჩევნების შემდეგ შეუძლებელია“, – განაცხადა ჯაფარიძემ.
ირაკლი აბსანძის შეკითხვაზე, სჯობს თუ არა, ოპოზიცია პარლამენტში შევიდეს და „ქართულ ოცნებასთან“ ერთად პასუხისმგებლობა გადაინაწილოს, ქვეყანაში და რეგიონში შექმნილი ვითარების გათვალისწინებით, ზურაბ ჯაფარიძემ განაცხადა, რომ ამ ვითარებაში, თუ მოცემულობა არ შეიცვალა, პარლამენტში შესვლა მხოლოდ და მხოლოდ ერთ შედეგს მოიტანს – არალეგიტიმური პარლამენტისთვის და ხელისუფლებისთვის ლეგიტიმაციის მიცემას.
„სინამდვილეში, ეს რაღაცნაირად, იქნება საკუთარი ამომრჩევლის შეურაცხყოფაც, მათ შორის. პასუხისმგებლობის განაწილებას რაც შეეხება, პოლიტიკური ბრძოლა შეიძლება, პარლამენტიდანაც აწარმოო და გარედანაც“, – განაცხადა ჯაფარიძემ.
მისი თქმით, პოლიტიკური გაერთიანება „გირჩი“ პარლამენტს გარეთ ბრძოლაში გამობრძმედილია და პარტიის შემთხვევაში პარლამენტში შესვლა მხოლოდ და მხოლოდ იმ თვალსაზრისით იყო მნიშვნელოვანი, რომ „გირჩთან“ ერთად იქ სხვა ოპოზიციური პარტიებიც შედიოდნენ, რომლებთანაც გარკვეული შეთანხმება არსებობდა, რა რეფორმები უნდა გატარებულიყო.
„ახლა უკვე, რეალურად, პარლამენტში არავინ შედის. ყველა ბოიკოტის რეჟიმში ვართ და „გირჩი“ რომ პარლამენტში შევიდეს, მხოლოდ და მხოლოდ იმას მიაღწევს, რომ არალეგიტიმურ ხელისუფლებას ლეგიტიმაცია მისცეს“, – განაცხადა ჯაფარიძემ.
შეკითხვაზე, რა დათმობაზე უნდა წავიდეს ხელისუფლება, რათა „გირჩმა“ ჩათვალოს, რომ პარლამენტში მისი ადგილი არის, ზურაბ ჯაფარიძემ განაცხადა, რომ თუ ხელისუფლება არჩევნების გაყალბებას აღიარებს, მეორე ტურს აზრი მიეცემა და ამ ტურში არჩევნების ბედი გადაწყდება, ეს შეიძლება, განხილვის საგანი იყოს.
„ოღონდ, ეს უნდა იყოს საერთო ოპოზიციური პოზიცია და არა მხოლოდ „გირჩის“, – განაცხადა ჯაფარიძემ.
ირაკლი აბსანძის შეკითხვაზე, რა გზავნილს ელოდება „გირჩი“ მაიკ პომპეოს ვიზიტიდან, ჯაფარიძემ აღნიშნა, რომ არ იცის, თუმცა, მისი აზრით მნიშვნელოვანია, შეხვედრა ოპოზიციასთანაც შედგეს.
„ჩემი აზრით, მნიშვნელოვანია, შეხვედრა ოპოზიციასთანაც შედგეს, რომ მიუხედავად იმისა, რომ ის არის წარმავალი ადმინისტრაციის სახელმწიფო მდივანი, მას ჰქონდეს ინფორმაცია ასევე ოპოზიციის მხრიდანაც“, – განაცხადა ზურაბ ჯაფარიძემ.