თუ მოლაპარაკება გაგრძელდა და შეთანხმება ვერ შედგა, მანდატებზე უარის თქმა მალე მოხდება, რამდენიმე დღის ამბავია, – ამის შესახებ ზურაბ ჯაფარიძემ განაცხადა. „გირჩის“ ლიდერი არ გამორიცხავს, რომ შეთანხმების მიღწევის შემთხვევაში პარლამენტში არ შევა, თუმცა აღნიშნავს, რომ ამის ალბათობა დაბალია.
„ფორმალურად „გირჩი“ გავიყავით, პარტიის თავმჯდომარე იაგო ხვიჩიაა, მე რამდენადაც ვიცი ისინი ბოიკოტის რეჟიმში არიან ოპოზიციასთან ერთად და შესაბამისად მაქვს მოლოდინი, რომ სიას ჩახსნიან. მე ინდივიდუალურ განცხადებას დავწერ მაშინვე, როცა პროცედურულად ამის დრო იქნება. თუ ჩაინიშნება შემდეგი რაუნდი და რამე შეთანხმება შედგება, მაშინ არის შანსი პარლამენტში შესვლის, თუმცა ალბათობა ძალიან დაბალია“, – განაცხადა ჯაფარიძემ.
მისივე თქმით, ის არ მიიღებს მონაწილეობას ოპოზიციის ღონისძიებაში, რომელიც 11 დეკემბერს, პარლამენტის პირველი სხდომის პარალელურად უნდა გაიმართოს.
„ოპოზიციას რაღაც ცერემონია ჰქონდა დაგეგმილი, რაღაც დოკუმენტზე უნდა მოეწერათ ხელი. მე ამაში არ ვმონაწილეობ, იმიტომ, რომ ბევრჯერ მაქვს ასეთ დოკუმენტებზე ხელი მოწერილი. არ მგონია ბოიკოტს ჩემგან დამატებით რამე მტკიცებულება სჭირდებოდეს“, – განაცხადა ჯაფარიძემ.