ფოთში 45 წლის მამაკაცი მანქანაში ჩაცხრილეს. მოკლული შვილთან და კიდევ ერთ თანმხლებ პირთან ერთად იმყოფებოდა. არსებული ინფორმაციით მოკლული საქართველოში გასული წლის დეკემბერში დაბრუნდა.
გურამ ახალაიას ცეცხლნასროლი 6 ჭრილობა აქვს მიყენებული. “კურიერის” ინფორმაციით, მოტივი ძმის მკვლელობის გამო შურისძიებაა.
თვითმხილველთა თქმით, მკვლელობა შსს-ს მომსახურების სააგენტოს შენობიდან რამდენიმე მეტრში მოხდა.
“იყო რამდენჯერმე გასროლა, ჩაცხრილეს მამაკაცი მანქანაში და როგორც ვიცი ეს იყო ანგარიშსწორება. ზუსტად არ ვიცი არაფერი,”- უთხრა “კურიერს” ერთ-ერთმა თვითმხილველმა.
შინაგან საქმეთა სამინისტროს საპატრულო პოლიციის დეპარტამენტის უფროსის ვაჟა სირაძის განცხადებით, დანაშაულის სავარაუდო ჩამდენი პირი პოლიციამ, ცხელ კვალზე დააკავა, მიმდინარეობს საგამოძიებო მოქმედებები.
გამოძიების ინფორმაციით, დაკავებულმა 2021 წლის 4 თებერვალს ფოთში, ჭავჭავაძის ქუჩაზე, წარსულში არსებული დაპირისპირების გამო, 1978 წელს დაბადებული გ.ა. ცეცხლსასროლი იარაღიდან გასროლით მოკლა და შემთხვევის ადგილიდან მიიმალა.