უფასო ქათმის ფრთები, უფასო კვერცხები, სუპერმარკეტების ვაუჩერები და ფულადი პრიზები – ეს არის ის ჩამონათვალი, რასაც ჩინეთი საკუთარ მოქალაქეებს ვაქცინაციის სანაცვლოდ სთავაზობს.
ჩინეთში, სადაც ვაქცინების მწარმოებლები თავდაპირველად ფოკუსირებულნი იყვნენ დოზების ექსპორტზე, ჯანდაცვის წარმომადგენლების განცხადებებით, მოსახლეობის მხოლოდ 4%-ია აცრილი. ქვეყნის ხელისუფლების მიზანი კი, წლის ბოლომდე მოსახლეობის 64 %-ის ვაქცინაციაა.
ორშაბათს ჩინეთის ჯანმრთელობის ეროვნულმა კომისიამ განაცხადა, რომ ვაქცინების 140 მილიონი დოზაა ჩაბარებული და ათვისებული ვაქცინების რაოდენობა დღეში 10 მილიონს მიაღწევს.
ამ მიზნის მისაღწევად, ოფიციალური პირები მობილიზდნენ ადგილობრივ რაიონებსა და უბნებში, უნივერსიტეტებში, ბიზნესებსა და სკოლებში, რათა დაითანხმონ მოსახლეობა მიიღონ ხუთი ჩინური ვაქცინა, რომელიც ქვეყნის შიგნით გამოყენებისთვის უკვე დამტკიცებულია.
მთავრობა აღნიშნული ინიციატივით საზოგადოების ჩინური ვაქცინების უსაფრთხოების დასარწმუნებლად გამოვიდა.