ინდოეთში კოვიდსიტუაცია შემზარავია, – განაცხადა ჯანდაცვის მსოფლიო ორგანიზაციის გენერალურმა დირექტორმა, ტედროს ადჰანომ გებრეიესუსმა.
ტედროს ადჰანომ გებრეიესუსის თქმით, ჯანდაცვის მსოფლიო ორგანიზაცია ინდოეთში დამატებით პერსონალსა და პანდემიასთან ბრძოლისთვის საჭირო აღჭურვილობას აგზავნის.
„ჯანმო ყველაფერს აკეთებს, რაც შეგვიძლია. ინდოეთს აღჭურვილობასა და მარაგებს ვაწვდით, მათ შორის ჟანგბადის კონცენტრატორებს, ასაწყობ მობილურ საველე საავადმყოფოებსა და ლაბორატორიულ მასალებს“, – აღნიშნა ჯანდაცვის მსოფლიო ორგანიზაციის გენერალურმა დირექტორმა.
ინდოეთში საავადმყოფოებში ჟანგბადის დეფიციტია, ბევრი კლინიკა გადავსებულია და პაციენტებს ვეღარ იღებს.
ინდოეთის ჯანდაცვის სამინისტროს მონაცემებით, ქვეყანაში გასული დღე-ღამის განმავლობაში, კორონავირუსის 352 991 ახალი შემთხვევა დადასტურდა, ხოლო 2 812 ადამიანი გარდაიცვალა.
პანდემიის დაწყებიდან დღემდე, ინდოეთში კორონავირუსის 17.31 მილიონი შემთხვევა დადასტურდა, ხოლო 195 123 ადამიანი ვირუსს ემსხვერპლა.