ინდოეთში კორონავირუსისგან ყველაზე მეტად დედაქალაქი დელი და დასავლეთით მდებარე შტატი მაჰარაშტრა დააზარალა, თუმცა ინფექცია მთელი ქვეყნის მასშტაბით ძალიან სწრაფად ვრცელდება.
გადატვირთული მუშაობის გამო, დელიში კრემატორიუმები იძულებულები არიან, სახელდახელოდ მოაწყონ ფართები კოცონებისთვის, სადაც გარდაცვლილებს წვავენ. კრემატორიუმები დედაქალაქში 24-საათიანი რეჟიმით მუშაობენ. ბოლო 24 საათში დელიში 381 ადამიანი გარდაიცვალა. როგორც BBC წერს, გარდაცვლილების ახლობლებს კოცონისთვის საჭირო შეშის მიტანასაც სთხოვენ.
WhatsApp, როგორც გადარჩენის საშუალება
ინდოეთის მოსახლეობა საავადმყოფოებში თავისუფალი საწოლების, პრეპარატების, ჟანგბადის მოძიებას WhatsApp-ის საშუალებით ცდილობს. შექმნილია უამრავი ჯგუფი, სადაც ინდოელები ინფორმაციას ცვლიან. ბევრი მათგანი დახმარებას ჟურნალისტებს სთხოვს – BBC-ს კორესპონდენტი ინდოეთში ვიკას პანდი ამბობს, რომ მას უამრავი ადამიანი უკავშირდება.
“თითქმის ყველა მათგანს ერთი რამე სურს – თავისუფალი საწოლი საავადმყოფოში, ახლობელი ადამიანებისთვის. ხან მათ დახმარებას ვახერხებ, მაგრამ უმეტეს შემთხვევაში – არ გამომდის. არცერთი ექიმი თუ თანამდებობის პირი, რომელსაც მე ვიცნობ, ტელეფონის ზარებს არ პასუხობს.
არიან ისეთებიც, ვინც მედიკამენტებს ეძებენ – ძირითადად, ანტივირუსულ “რემდესივირს”, რომელსაც ექიმები მხოლოდ ძალიან მძიმე პაციენტებს უწერენ. შავ ბაზარზე წამალი ოფიციალურ ფასზე 10-ჯერ ძვირად იყიდება, თუმცა არც იქ არის მისი შოვნა ადვილი. ამას გარდა, მირეკავენ ჟანგბადის ბალონებისთვის, რომ მათმა ახლობელმა ადამიანებმა სუნთქვა შეძლონ” – წერს ვიკას პანდი.
რას აკეთებს მსოფლიო ინდოეთისთვის
უკვე ინდოეთშია დიდი ბრიტანეთიდან გაგზავნილი დახმარება, ქვეყანას სამედიცინო რესურსებს უგზავნის საფრანგეთი, ირლანდია, გერმანია, ამერიკის შეერთებული შტატები და ჯანმრთელობის მსოფლიო ორგანიზაცია.
აშშ-ის პრეზიდენტი აპირებს, ინდოეთში ვაქცინები გაგზავნოს – ჯო ბაიდენის თქმით, უკვე ესაუბრა ინდოეთის პრემიერ-მინისტრს ნარენდრა მოდის, თუმცა არ დაუკონკრეტებია, როდის და რა რაოდენობის ვაქცინას გაგზავნის. მანამდე კი, ბაიდენის თქმით, აშშ-სგან ინდოეთი ანტივირუსულ მედიკამენტებს მიიღებს.