ევროპარლამენტარმა ანა ფოტიგამ ევროპარლამენტის პლენარულ სესიაზე, რუსეთის ოპოზიციისა და კერძოდ ალექსეი ნავალნისადმი მხარდაჭერა ღიად დააფიქსირა.
“რუსეთის აგრესიულ ქცევაზე საუკეთესო პასუხი არის ჩვენ მიერ შეთანხმებული რეზოლუცია, რომელშიც მოვუწოდებთ რუსეთს, დაემორჩილოს საერთაშორისო წესრიგს, პატივი სცეს მეზობელი ქვეყნების სუვერენიტეტს, უსაფრთხოებას და ტერიტორიულ მთლიანობას. ჩვენ მხარს ვუჭერთ უკრაინას და ამის დემონსტრირების საუკეთესო გზა არის ისეთი პროექტების დაუყოვნებლივ შეჩერება, როგორიცაა რუსული გაზსადენი “ჩრდილოეთის ნაკადი-2”-ისა და ნატო-ს წევრობის სამოქმედო გეგმის გადაცემა უკრაინისა და საქართველოსთვის. ჩვენ, ვიშეგრადის ოთხეულის წევრი ქვეყნები სოლიდარობას ვუცხადებთ ჩეხეთს და მივესალმებით ამ ქვეყნის პასუხს სახელმწიფო ტერორიზმზე, რომელიც რუსეთის მოქმედმა ოფიცრებმა მოაწყვეს ჩეხეთის ტერიტორიაზე. ჩვენ მხარს ვუჭერთ რუსეთის ოპოზიციას და კერძოდ, ალექსეი ნავალნის,” – განაცხადა ფოტიგამ.
ნავალნის საკითხი, უკრაინის აღმოსავლეთ საზღვართან ბოლოდროინდელი სამხედრო დაძაბულობა და 2014 წელს ჩეხეთის რესპუბლიკაში შეიარაღების საწყობის აფეთქება – ეს ის საკითხებია, რომელიც ევროპარლამენტის პლენარულ სესიაზე განიხილეს.
სხდომაზე, რომელიც 4 საათზე მეტხანს გაგრძელდა აღმოსავლეთ უკრაინაში არსებულ კონფლიქტთან ერთად ყურადღება საქართველოზეც გამახვილდა. ევროპელმა დეპუტატებმა თითქმის ერთხმად დაგმეს რუსეთის აგრესიული პოლიტიკა და მზადყოფნა გამოთქვეს მხარი დაუჭირონ რუსეთის წინააღმდეგ მორიგ სანქციებს.