ამ ადამიანებს დიდი ხანია სხვა გზა არ დარჩენიათ გარდა იმისა, რომ პარლამენტში შემოვიდნენ, თუმცა ვერ ვიტყვი, რომ მათი შემოსვლით საპარლამენტო ცხოვრებას კონსტრუქცივიზმი შეემატება – ამის შესახებ ჟურნალისტებს პარლამენტის საპროცედურო საკითხთა კომიტეტის თავმჯდომარემ, ირაკლი ქადაგიშვილმა განუცხადა, რომელიც კიევში „ნაციონალური მოძრაობის“ წევრების ვიზიტს გამოეხმაურა.
დეპუტატის თქმით, მთელი ეს მოძრაობა შიდაპარტიული ცხოვრების გარკვევა-დალაგებასთან არის დაკავშირებული და თავიანთი ელექტორატის წინაშე თავის მართლებას ეწევიან იმ ექვს-შვიდი თვიანი პოლიტიკის გამო, რაც მათ ატარეს, რომელიც სრული ფიასკოთი დამთავრდა.
„სააკაშვილს პოლიტიკური მანევრის საშუალება აღარ აქვს და იძულებულია თქვას – უნდა შეხვიდეთ პარლამენტში. სახელმწიფო გადატრიალების მცდელობა თავიდან ბოლომდე ჩაფუშულია, რასაც საერთაშორისო პარტნიორებისა და მოქალაქეების მხრიდან არანაირი მხარდაჭერა არ ჰქონია“, – განაცხადა ქადაგიშვილმა.