საქართველოსთვის აშშ-ისგან მორიგი გრანტის გამოყოფა არის ერთობლივი ფასეულობების დამამტკიცებელი მხარდაჭერა, რომელიც გააძლიერებს საქართველოს მდგრადობას გარედან მომდინარე საზიანო ეფექტებისადმი, – ამის შესახებ საქართველოში აშშ-ის ელჩმა კელი დეგნანმა მთავრობის ადმინისტრაციაში გამართულ ბრიფინგზე განაცხადა.
მისი თქმით, მომდევნო ხუთი წლის განმავლობაში აშშ გააგრძელებს საქართველოს დახმარებას, რათა გაძლიერდეს სახელმწიფო ინსტიტუტები და შეიქმნას ის შესაძლებლობები, რომელიც დღევანდელ და სამომავლო გამოწვევებს დაძლევს.
„ძალიან მახარებს, რომ დღეს თქვენ წინაშე ვიმყოფები და ძალიან მნიშვნელოვან ნაბიჯს აღვნიშნავთ ჩვენს სტრატეგიულ პარტნიორობაში აშშ-სა და საქართველოს შორის. აშშ-ის საერთაშორისო განვითარების სააგენტოს დირექტორი და საქართველოს ფინანსთა მინისტრი ხელს მოაწერენ ახალ საგრანტო შეთანხმებას, რომელიც შესაძლებელს გახდის, რომ ამერიკელმა ხალხმა USAID-ის საშუალებით 330 მილიონი აშშ დოლარი გამოყოს მომდევნო ხუთი წლის განმავლობაში საქართველოს მდგრადი განვითარებისთვის. ეს არის ჩვენი ერთობლივი ფასეულობების დამამტკიცებელი მხარდაჭერა, რომელიც გააძლიერებს საქართველოს მედეგობასა და გამძლეობას გარედან მომდინარე საზიანო ეფექტებისგან, გააძლიერებს დემოკრატიულ ინსტიტუტებს, მოიტანს ძლიერ ეკონომიკურ ზრდას და შექმნის დასაქმების შესაძლებლობას ქვეყანაში. ეს დახმარება ბევრი მიმართულებით შექმნის შესაძლებლობებს, შეიქმნება ახალი პროგრამა ენერგეტიკის უსაფრთხოების მიმართულებით, საქართველო შეძლებს ენერგორესურსების დივერსიფიკაციას და შეამცირებს რუსეთის დამოკიდებულებას. ეს შესაძლებელს გახდის, საქართველოს მოსახლეობისთვის ხარჯების შემცირების მიმართულებით. ჩვენ ამ მიმართულებით ახალ ინიციატივებს ვამუშავებთ, რათა გაიზარდოს ეკონომიკური შესაძლებლობები და გაიზარდოს ხალხთაშორისი ურთიერთობა, ასევე ეს მოიცავს ადმინისტრაციული საზღვრის მიღმა მყოფ თემებსა და საზოგადოებას.
ჩვენ გავაგრძელებთ ინვესტიციებს საბაზისო განათლებაში. იმ 7 მილიონის მიღმა, რომელსაც ვახორციელებთ USAID-ის პროგრამის ფარგლებში, რომელიც გასულ წელს დაიწყო. დაიწყება ახალი პროგრამა სამოქალაქო განათლების კუთხით, რაც სამომავლოდ შექმნის რესურსს, რომ კადრები ამ სფეროში მზად იყვნენ. USAID დაეხმარება ქვეყანას ადგილობრივ და ეროვნულ დონეზე, რომ მეტი გამჭვირვალობა, მეტი ანგარიშვალდებულება არსებობდეს და ლიდერები ანგარიშვალდებული იყვნენ ხალხის წინაშე. და ბოლოს, ეს დაფინანსება შესაძლებელს გახდის, USAID-მა ახალი პროგრამები დააფინანსოს საქართველოში. მათ შორის ერთ-ერთი ახლახანს გამოცხადებული, რაც გულისხმობს უმუშევრობის დონის შემცირებას, საწარმოების განვითარებას და გაფართოებას სამუშაო ადგილების შექმნის მიზნით. აქედან გამომდინარე, თქვენ ხედავთ, რომ ძალიან გვახარებს ეს ახალი პროგრამა, ახალი ფაზა ჩვენს ურთიერთობაში, რომელიც ეფუძნება იმ წინსვლას, რომელიც საქართველომ უკვე მიაღწია დემოკრატიული ინსტიტუტების განვითარების, საბაზრო ეკონომიკის განვითარების სივრცეში.
მომდევნო ხუთი წლის განმავლობაში აშშ გააგრძელებს საქართველოს დახმარებას, რათა გაძლიერდეს სახელმწიფო ინსტიტუტები და შეიქმნას ის შესაძლებლობები, რომელიც დღევანდელ და სამომავლო გამოწვევებს დაძლევს. აშშ ერთგულია საქართველოს წარმატების, დემოკრატიული ინსტიტუტების განვითარების კუთხით“, – განაცხადა კელი დეგნანმა.