პარლამენტის იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, ოპოზიცია „ამნისტიის შესახებ“ კანონპროექტზე იმის რევიზიას ახდენს, რასაც ხელი მოაწერა და ახლა პასუხისმგებლობის აღებისგან გაქცევას ცდილობს.
ადამიანის უფლებათა დაცვის კომიტეტის სხდომაზე ანრი ოხანაშვილმა განაცხადა, რომ ამნისტია „ქართული ოცნების“ ინიციატივა არ ყოფილა.
მისი თქმით, არ არის ამნისტიის მიღების მომხრე, მაგრამ შეთანხმების ერთგულია.
„თუ ვთანხმდებით, რომ კანონპროექტი არ უნდა მივიღოთ, კი ბატონო. მაშინ უნდა აღსრულდეს კანონი ნიკანორ მელიას მიმართ, რომელიც უმძიმეს დანაშაულში არის ბრალდებული. არ ვარ მომხრე, რომ ამნისტია მივიღოთ, მაგრამ ვარ შეთანხმების ერთგული. თუ თქვენ არღვევთ შეთანხმების ტექსტს, დააფიქსირეთ ღიად და პოლიტიკურად ყველას მოუწევს პასუხისმგებლობის აღება. საერთოდ არ ვარ წინააღმდეგი, რომ ამნისტიის აქტი არ მივიღოთ. ძალიან კარგად იცით, რომ ეს „ქართული ოცნების“ ინიციატივა არ ყოფილა და საკითხი მოლაპარაკების მაგიდაზე „ქართულ ოცნებას“ არ დაუსვამს. ეს არის პოლიტიკური აქტი და არა ჰუმანური. ეს არა ვინმეს გამართლების აქტი, არამედ პატიების აქტია”, – განაცხადა ანრი ოხანაშვილმა.
ადამიანის უფლებათა დაცვის კომიტეტის სხდომაზე, „ამნისტიის შესახებ” კანონპროექტზე პირველი მოსმენით მსჯელობენ. ცვლილებებს აკრიტიკებს „ლელო“. ისინი პროექტის განხილვის გადადებას ითხოვენ მანამდე, ვიდრე პარლამენტი არ მოისმენს, რა პროცესებს ჰქონდა ადგილი 19-20 ივნისს.